ކުރީގެ ރައީސް އަބްދުﷲ ޔާމީންގެ ވެރިކަމާ ދެކޮޅަށް އަޑުއުފުލައި ވޯޓު ދިނުމުން ގޮނޑި ގެއްލުވާލި 12 މެމްބަރުންގެ ތެރެއިން ގއ. ވިލިނގިލީ ދާއިރާގެ މެމްބަރު ސައުދު ހުސެއިން ފިޔަވައި އެންމެ މެމްބަރަކަށް ވެސް 19 ވަނަ މަޖިލީހުގެ އިންތިޚާބަށް ވާދަކޮށް ކާމިޔާބީއެއް ނުލިބުނެވެ.
ބާރަ މެމްބަރުންގެ ތެރެއިން ގިނަ މެމްބަރުން ޖުމުހޫރީ ޕާޓީއާ ގުޅިވަޑައިގެންފައިވާއިރު ބައެއް މެމްބަރުން ވަނީ އަމިއްލަ ގޮތުން ވެސް ވާދަކޮށްފައެވެ. އިހަވަންދޫ ދާއިރާގެ މެމްބަރު މުހައްމަދު އަބްދުﷲ(މުހައްމާ) އެމްޑީޕީއާ ގުޅުމަށް ފަހު އެމްޑީޕީ ޕްރައިމަރީގައި ނާކާމިޔާބުވުމުން އަމިއްލަ ގޮތުން ވާދަކޮށް މިފަހަރުވެސް ކާމިޔާބެއް ލިބިފައެއް ނުވެއެވެ.
ސައުދު ހުސެއިން ގޮޑި ކާމިޔާބު ކުރެއްވީ އެމްޑީޕީ މެމްބަރު ހާރޫނު އާއި ވާދަކޮށެވެ.
މީގެ އިތުރުން މަޑުއްވަރީ ދާއިރާއިން އަމީތު ތިންވަނައަށް ގޮސްފައިވާއިރު ގޮނޑި ކާމިޔާބުކޮށްފައިވަނީ ކުރީގެ ޑިފެންސް މިނިސްޓަރު އާދަމް ޝަރީފްއެވެ.
ވަގުތީ ނަތީޖާއިން ދިއްދޫ ދާއިރާގެ ގޮނޑި މުހައްމަދު ލަތީފަށް ގެއްލިފައިވާއިރު ލަތީފް ގޮސްފައިވަނީ އިންތިޚާބުގެ އެންމެ ފަހަތަށެވެ. މިދާއިރާގެ ގޮނޑި ކާމިޔާބުކޮށްފައިވަނީ އެމްޑީޕީ ކެންޑިޑޭޓް އަބްދުﷲ ވަހީދެވެ.
އިތުރު ގޮނޑިތަކަށް ބަލާއިރު، ތުލުސްދޫ ދާއިރާއަށް އަނެއްކާވެސް ވާދަކޮށް މުހައްމަދު ވަހީދު އިބްރާހިމް(ލޯޔަރު ވައްޑެ) ވަނީ ނާކާމިޔާބުވެފައެވެ. އަމިއްލަ ގޮތުން ވާދަކުރި އިބްރާހިމް ނަސީމް ވަގުތީ ނަތީޖާއިން ކުރީގައި އޮތް އިރު ދެވަނައަށް ގޮސްފައިވަނީ އަބްދުﷲ ރާފިއުއެވެ.
ހަނިމާދޫ ދާއިރާގެ މެމްބަރު ޝަހުދީ ފަހަތަށް ޖައްސާލުމަށް ފަހު ގޮނޑި ކަށަވަރުކޮށްފައިވަނީ ކުޅުދުއްފުށީ އުތުރު ދާއިރާގެ މިހާރުގެ މެމްބަރު އަބްދުލްޣަފޫރު މޫސާއެވެ. ދަނގެތީ ދާއިރާ ދޫކުރައްވައި އުނގޫފާރު ދާއިރާއަށް އިލްހާމް އަހުމަދު ވާދަކުރެއްވުމުން އެދާއިރާގެ ގޮނޑި ކާމިޔާބުކޮށްފައިވަނީ އެމްޑީޕީ ކެންޑިޑޭޓު މުހައްމަދު ވަހީދެވެ.
ތިމަރަފުށި ދާއިރާގެ ގޮނޑި މުސްތަފާއާ ވާދަކޮށް ރިޔާޒް ކާމިޔާބުކޮށްފައިވާއިރު މައްޗަނގޮޅި ދެކުނު ދާއިރާގެ ގޮނޑި ސިނާން ބަލިކޮށް ކާމިޔާބުކޮށްފައިވަނީ އެމްޑީޕީ ކެންޑިޑޭޓް ޚައިތަމްއެވެ. ތިނަދޫ ދެކުނާއި އުތުރުވެސް މިފަހަރު އެމްޑީޕީން ކާމިޔާބުކޮށްފައިވާއިރު އަބުޅޯ އަދި ސައުދުﷲ ހިލްމީވެސް ވަނީ ފަހަތަށް ޖައްސާލާފައެވެ. ފުވައްމުލަކު އުތުރާއި ދެކުނުވެސް އެމްޑީޕީން ނަގާފައިވާއިރު އަލީ ޝާހު އަދި ފަޒާދުވެސް މިފަހަރު ވަނީ އިންތިޚާބުން ނާކާމިޔާބުވެފައެވެ.