އިއްޔެ ބޭއްވުނު ރައްޔިތުންގެ މަޖިލިސް އިންތިޚާބުގައި ގަލޮޅު ދެކުނު ދާއިރާއަށް ކުރީގެ ރައީސް މައުމޫންގެ ތާއީދާއެކު ވާދަކުރެއްވި އާމިނަތު ނާދިރާ، ހުރިހާ ކެންޑިޑޭޓުންނަށް ރީތި މިސާލު ދައްކަވައިފިއެވެ.
ދާއިރާގެ ގޮނޑި، އެމްޑީޕީގެ ކެންޑިޑޭޓް މީކާއިލް އަހުމަދު ނަސީމް ކާމިޔާބު ކުރުމާއެކު ނާދިރާ ވަނީ މީކާއިލަށް މަރުހަބާ ދަންނަވާފައެވެ. ގިނަ ބަޔެއްގެ އިހުތިރާމް އެހާހިސާބުން ވެސް ނާދިރާ އަށް ލިބިފައިވާއިރު އެއަށްފަހު ރޭ، ނާދިރާ ވަނީ އޭނާގެ ކެމްޕޭނު ޓީމާއެކު މަގުމަތީގައި ހަރުކޮށްފައިހުރި ކެމްޕޭނު ޕޯސްޓަރާއި ބެނާތައް ވެސް ނަގައި، މަގުމަތި ސާފުކޮށްލާފައެވެ.
Removing my campaign Banners & posters. I am thankful to the wonderful and dedicated team wz me. @ZahaWaheed @moonty12 @AwsumMen @AbdulAleemMV @nannylubi11 @Dee_ahumadh @IbrahimFarherd @uhudhu @victorysuzain @ahmed_ziyaan @visnaa_please @BenRazan Shuaib, Shamsu, Anthu & my family pic.twitter.com/0GZGT8Fk6y
— Nadira #FreePalestine🔴⚫️⚪️🟢 (@a_nadraa) April 6, 2019
މަޖިލިސް އިންތިޚާބުގައި 381 ކެންޑިޑޭޓުން ވާދަކޮށްފައިވާއިރު ހުރިހާ ކެންޑިޑޭޓުން ވެސް ވަނީ ތާއީދު ހޯދުމަށް ބުރަ މަސައްކަތް ކޮށް، ބެނާތަކާއި ޕޯސްޓަރުތައް މަގުމަތީގައާއި ގޭގޭ ފާރުތަކުގައި ހަރުކޮށްފައެވެ.
ނަމަވެސް ރާއްޖެއިން ގިނައިން ފެންނަ މަންޒަރަކީ އިންތިޚާބު ނިމުމުން ހަރުކުރި ސާމާނު ނެގުމެއް ނެތި ދޫކޮށްލާފައި ހުރުމެވެ. ކާމިޔާބުވި ކެންޑިޑޭޓުންނާއި ނާކާމިޔާބުވި ކެންޑިޑޭޓުންވެސް މިފަހަރު ނާދިރާ ދެއްކި މިސާލުން މިސާލު ނަގައި އެގޮތަށް އަމަލުކުރުމަކީ ޑިމޮކްރަސީގެ ރީތި އުސޫލެވެ.
ނާދިރާގެ މި އަމަލަށް އެމްއާރްއެމްގެ ލީޑަރ އަދި ކުރީގެ ރައީސް މައުމޫން އަބްދުލްޤައްޔޫމް ވެސް ވަނީ ތައުރީފް ކޮށްފައެވެ. އޭގެ އިތުރުން އެމްޑީޕީގެ ގިނަ ސަޕޯޓަރުން ވެސް ވަނީ ވަރަށް ބޮޑަށް ތައުރީފްކޮށް ނާދިރާއަށް ހިތްވަރު ދީފައެވެ.