އިއްޔެ ބޭއްވުނު ރައްޔިތުންގެ މަޖިލީހުގެ އިންތިހާބުން އެމްޑީޕީއަށް މަޖްލިސްގެ ސުޕަ މެޖޯރިޓީ ލިބުނު ނަމަވެސް ކޯލިޝަން ދަމަހައްޓަން މަސައްކަތް ކުރައްވާނެކަމަށް ރައީސް އިބްރާހިމް މުހައްމަދު ސޯލިހު ވިދާޅުވެއްޖެއެވެ.
މަޖްލިސް އިންތިހާބްގެ ނަތީޖާއަށް ފަހު ރައީސް ނެރުއްވި ބަޔާނެއްގައި ވިދާޅުވީ ރައީސް ޔާމީންގެ ސަރުކާރުގެ އަނިޔާވެރިކަމާއި ކަރަޕްޝަން ނިންމުމަށް އެމަނިކުފާން ވެރިކަމަށް ދިވެހި ރައްޔިތުން ގެނައީ ގުޅިފައިވާ ސިޔާސީ ޕާޓީތަކުން އެކުލަވާލި ކޯލިޝަނުންކަމަށާއި އެކަން ހަނދާން ނުނެތޭ ކަމަށެވެ.
ރައީސް ވިދާޅުވީ ކޯލިޝަންގައި ހިމެނޭ ޕާޓީތައް ވަކިވަކިން އިންތިހާބުގައި ވާދަކުރުމަކީ ކޯލިޝަން ރޫޅެން ޖެހޭ ސަބަބެއް ނޫންކަމަށެވެ. އަދި އިއްޔެގެ އިންތިހާބުން އަނެއްކާވެސް ދިވެހި ރައްޔިތުން ކާމިޔާބު ހޯދީ ރައްޔިތުން ބޭނުންވާ ބަދަލު ގެނައުމަށް ކަމަށެވެ.
އެގޮތުން ރިޔާސީ އިންތިހާބުގައި ވީ ވައުދުތައް ފުއްދުމަށް ގުޅިފައިވާ ސިޔާސީ ޕާޓީތަކުގެ ލީޑަރުންނާއި އެކު ބަދަހި ގުޅުމެއް ގާއިމްކޮށް މަސައްކަތް ކޮށްދެއްވާނެކަމަށް ރައީސް ސޯލިހު ވިދާޅުވިއެވެ.
ރައީސް ވިދާޅުވީ، މަޖިލީސް އިންތިޚާބަށް ފަހު މުޢައްސަސާތައް މިހާރަށްވުރެ ހަރުދަނާކޮށް، ރައްޔިތުންގެ އަސާސީ ހައްޤުތައް ކަށަވަރުކޮށްދީ، ޢަދުލް އިންސާފު ޤާއިމުކޮށް، ކޮރަޕްޝަނާއި ފަސާދައިގެ މޫތައް ލުހެލުމަށް ކުރަންޖެހޭ މަސައްކަތްތަކުގެ ހަޤީޤީ ފެށުން އަދި ކުރިއަށް އޮތީކަމަށެވެ.
ރައީސް ވަނީ މަޖްލިސް އިންތިހާބު އަމާން އޮމާން ކަމާއި އެކު ކުރިއަށް ގެންދިއުމުގައި އިލެކްޝަން ކަމިޝަނާއި، ސިފައިންނާއި ފުލުހުން އަދި މިނިވަން މުވައްސަސާތަކުން ކުރެއްވި ބުރަ މަސައްކަތް ފާހަގަކޮށް އެފަރާތްތަކަށް ޝުކުރު ދަންނަވާފައެވެ.