ނަވާރަ ވަނަ ރައްޔިތުންގެ މަޖިލީހުގެ މެމްބަރެއްގެ ގޮތުގައި މަސައްކަތްކުރައްވާނީ ކޯލިޝަން ސަރުކާރުގެ މެނިފެސްޓޯ ތަންފީޒު ކުރުމަށް ކަމަށާއި، އެމްޑީޕީގެ އެޖެންޑާ 19 ސިޔާސަތުގެ ތެރެއިން ރައްޔިތުންނަށް ލާބަހުރި ސިޔާސަތަކަށް ނޫނެކޭ ނުބުނާނެ ކަމަށް އަލަށް އިންތިޚާބުވި ޖުމުހޫރީ ޕާޓީގެ މަދު މެމްބަރުންގެ ތެރޭގައި ހިމެނޭ ކެންދޫ ދާއިރާގެ މެމްބަރު އަލީ ހުސެއިން ވިދާޅުވެއްޖެއެވެ.
މަޖިލީހުގައި މިހާރުވެސް ކެންދޫ ދާއިރާ ތަމްސީލު ކުރައްވަމުން ގެންދަވާ އަލީ ހުސެއިނަކީ ޖުމުހޫރީ ޕާޓީގެ ޓިކެޓުގައި ވާދަކުރި މެމްބަރުންގެ ތެރެއިން މަޖިލީހަށް އިންތިޚާބުވި ފަސް މެމްބަރުންގެ ތެރެއިން އެއް ބޭފުޅެވެ.
ކުރީގެ ރައީސް ޔާމީންގެ ސަރުކާރާ ދެކޮޅަށް ތެދުވެ އިސްލާހީ މަސައްކަތުގައި އެންމެ ބުރަކޮށް މަސައްކަތް ކުރެއްވި އެއް ބޭފުޅަކަށް އަލީ ހުސެއިންވާއިރު އޭނާ ވަނީ ސަރުކާރު ކޯލިޝަންގެ މައި ދެ ޕާޓީ، އެމްޑީޕީ އާ ޖުމުހޫރީ ޕާޓީގެ ކޯޅުމުގެ ތެރެއިން ވެސް ވަކި ކޮޅެއް ނުނަގާ އަމިއްލަ ކެމްޕޭނާއެކު ކުރިއަށް ވަޑައިގެންފައެވެ.
އިންތިޚާބު ވުމަށް ފަހު އަލީ ވިދާޅުވީ އެމްޑީޕީގެ ސިޔާސަތުތަކުގެ ތެރެއިން ވެސް ރަނގަޅު ސިޔާސަތެއް ހުށައެޅިއްޖެނަމަ ފުރިހަމަ އެއްބާރުލުން ލިބޭނެ ކަމަށެވެ. އަދި ދިވެހި ރައްޔިތުންގެ މަސްލަހަތާ އެއްގޮތް ބިލެއް ހުށައެޅިއްޖެނަމަ ބިލަށް ވޯޓު ދެއްވާނެ ކަމަށް ވިދާޅުވިއެވެ.
މީގެ އިތުރުން ސަރުކާރު ޖަވާބުދާރީ ކުރުވުމަކީ މަޖިލީހުގެ ކޮންމެ މެމްބަރެއްގެ ޒިންމާއެއް ކަމަށާއި އެކަން ވެސް އޭނާ ކުރާނެ ކަމަށް އަލީ ހުސެއިން ވިދާޅުވެފައިވެއެވެ.
ޖުމުހޫރީ ޕާޓީން ދެން މަޖިލީހަށް އިންތިޚާބުވި މެމްބަރުންނަކީ ޕާޓީގެ ލީޑަރ ގާސިމް އިބްރާހިމާއި، ތިމަރަފުށި ދާއިރާއަށް ވާދަކުރެއްވި ޕީޖީ ލީޑަރ އަބްދުﷲ ރިޔާޒް، ދަނގެތީ ދާއިރާއަށް ވާދަކުރެއްވި ކުރީގެ ޑިފެންސް މިނިސްޓަރ މުހައްމަދު ނާޒިމްގެ އިތުރުން ވިލުފުށީ ދާއިރާގެ މެމްބަރު ރިޔާޒު ރަޝީދެވެ.