ކާށިދޫ ދާއިރާގެ މަޖިލިސް ގޮނޑި ކާމިޔާބުކުރި މަޝްހޫރު ވިޔަފާރިވެރިޔާ އަދި އެދާއިރާގެ ކުރީގެ މެމްބަރު އަބްދުﷲ ޖާބިރު އއ. މަތިވެރީގައި ހަދާފައިވާ ގެސްޓު ހައުސްގައި ބަޔަކު ގަސްދުގައި ރޯކޮށްލީ ކަމަށް ތުހުމަތުކޮށް އެ މައްސަލަ ފުލުހަށް އޭނާ ހުށައަޅައިފިއެވެ.
ޖާބިރު ވިދާޅުވީ "ކާސާ މިއާ މޯލްޑިވްސް" ގެސްޓު ހައުސްއަކީ އޭނާ ގަނެފައިވާ ގެސްޓު ހައުސްއެއް ކަމަށެވެ. އޭގެ ފައިސާވެސް މުޅިން ދައްކާ ނިންމާފައިވާނެ ކަމަށާއި މިއީ ހިތަށް ރޯވި އަލިފާން ގަނޑެއް ކަމަށް ނުބެލެވޭ ކަމަށް ވިދާޅުވިއެވެ.
ޚަބަރު ލިބޭ ގޮތުގައި ގެސްޓް ހައުސްގައި ރޯވެ ތިން ކޮޓަރި ވަނީ ބޭނުން ނުކުރެވޭ ވަރަށް އަނދާފައެވެ. ނަމަވެސް ލިބުނު ގެއްލުމުގެ މުޅި ތަފްސީލެއް އަދި ހާމައެއް ނުކުރެއެވެ. އެ ގެސްޓު ހައުސްއަކީ 25 ކޮޓަރީގެ ބޮޑު ގެސްޓް ހައުސްއެއް ކަމަށް މައުލޫމާތު ލިބެއެވެ.