ނިމިގެން ދިޔަ ރައްޔިތުންގެ މަޖިލީހުގެ އިންތިހާބާއި ގުޅިގެން 21 ޝަކުވާ ލިބިފައިވާ ކަމަށް އިލެކްޝަންސް ކޮމިޝަނުން ބުނެފިއެވެ.
ހޮނިހިރު ދުވަހު ބޭއްވުނު މަޖިލިސް އިންތިހާބުގެ ވަގުތީ ނަތީޖާތައް އިއުލާން ކުރުމަށް އިލެކްޝަންސް ކޮމިޝަނުން މިހާރު ކުރިއަށް ގެންދާ ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން އިލެކްޝަންސް ކޮމިޝަންގެ ރައީސް އަހުމަދު ޝަރީފް ވިދާޅުވީ، މަޖިލިސް އިންތިހާބާއި ގުޅިގެން 21 ޝަކުވާއެއް އިލެކްޝަނަށް ހުށަހަޅާފައިވާ ކަމަށެވެ.
ޝަރީފު ވިދާޅުވީ އިލެކްޝަނަށް ހުށަހެޅި މައްސަލަ ތަކުގެ ތެރެއިން މިހާތަނަށް ޖަވާބުދާރީ ވެވިފައިވަނީ ދެ ޝަކުވާއަށް ކަމަށެވެ. އަދި ބާކީ ހުރި ޝަކުވާތައް އެއީ ބަލަން ޖެހޭ މައްސަލައެއްތޯ ނުވަތަ ނޫންތޯ ކަމިޝަނުން މިހާރު ބަލަމުންދާ ކަމަށެވެ.
ޝަރީފު ވިދާޅުވީ ކަމިޝަނަށް ހުށައެޅިފައިވާ 21 ޝަކުވާގެ ތެރޭގައި ހިމެނެނީ ރީ-ރަޖިސްޓްރޭޝަނާއި ގުޅޭ 15 ޝަކުވާއާއި، ވޯޓްލީ މަރުކަޒާއި ގުޅުން ހުރި ކަންކަމާއި ބެހޭ 4 ޝަކުވާއާއި އަދި ރިޝްވަތާއި ގުޅުންހުރި 2 ޝަކުވާ ކަމަށެވެ.