ގަމާއި ލަންކާ އާއި ދެމެދު ސީދާ ދަތުރުތައް އޮގަސްޓް މަހުގެ 7 ވަނަ ދުވަހު ފަށާނެ ކަމަށް ރައީސް މުހައްމަދު ވަހީދު ވިދާޅުވެއްޖެ އެވެ.
ގަން އެއާޕޯޓް ތަރައްގީކުރުމުގެ މަޝްރޫއު ރަސްމީކޮށް އިފުތިތާހުކުރުމަށް އެއާޕޯޓްގައި މިއަދު ހަވީރު ބޭއްވި ރަސްމިއްޔާތުގައި ވާހަކަފުޅު ދައްކަވަމުން ރައީސް ވިދާޅުވީ ގަމާއި ލަންކާއާ ދެމެދު ސީދާ ދަތުރުތައް ފަށުމުގެ ވާހަކަ މީޑިއާގައި ދެކެވެތާ ދުވަސްކޮޅެއް ވެއްޖެކަމަށެވެ. އެގޮތުން އެވާހަކަ އެންމެ ފުރަތަމަ ދެއްކީ ސްރީލަންކަންއިން ކަމަށެވެ.
ރައީސް ވިދާޅުވީ ސްރީލަންކަން އާއި ދެމެދު މަޝްވަރާ ކުރެވިފައި ވަނިކޮށް ސަރުކާރަށް ފެނުނު އެންމެ ރަނގަޅު ގޮތަކީ ގައުމީ އެއާލައިން މެދުވެރިކޮށް ގަމާއި ލަންކާ އާ ދެމެދު ދަތުރު ފަށަން ކަމަށެވެ.
"މި މަޝްވަރާތަކުގެ މައްޗަށް ބިނާކޮށް އަޅުގަނޑުމެންނަށް އެންމެ ފަހުން ފެނުނީ ރާއްޖެ އަށް އެންމެ ފައިދާ ހުރި ގޮތަކީ އަޅުގަނޑުމެންގެ ގައުމީ އެއާލައިން މޯލްޑިވިއަން ބޭނުންކޮށްގެން ދަތުރުތައް ފަށަން،" ރައީސް ވިދާޅުވި އެވެ. "އެހެންވެ މިހާރު ހަމަޖެހިފައި މިއޮތީ މޯލްޑިވިއަންގެ ފްލައިޓްތައް އައްޑޫ ގަމުން ބޭރަށް ފުޅާކުރަން. މިކަން އިރާދަ ކުރެވިއްޔާ އޮގަސްޓް މަހުގެ ހަތް ވަނަ ދުވަހު ފަށާ ގޮތަށް ވަނީ ހަމަޖެހިފައި."
އެއާޕޯޓް ތަރައްްޤީކުރުމަށް މިއަދު ބޭއްވި ރަސްމިއްޔާތުގައި ޓްރާންސްޕޯޓް މިނިސްޓަރު އަމީން އިބްރާހީމް ވަނީ މޯލްޑިވިއަން އިން ލަންކާ އަށް ދަތުރު ފެށުމުގެ ހުއްދަ ހަވަލުކޮށްފައެވެ. އަދި މޯލްޑިވިއަންގެ ފަރާތުން އެކުންފުނީގެ މެނޭޖިން ޑިރެކްޓަރ ހާރިސް އަލީ ވަނީ ހުއްދަ އާއި ހަވާލުވެފައެވެ.
މޯލްޑިވިއަނުން ގަމާއި ލަންކާ އާއި ދެމެދު ދަތުރުފަށާއިރު އެކުންފުނިން ވަނީ މީގެ ކުރިން މާލެ / ކޮލަމްބޯއަށް ދަތުރުކޮށްފއެވެ. ނަމަވެސް އެ ސެކްޓާއިން ފައިދާ ނުވާކަމަށް ބުނެ ދަތުރުވަނީ ހުއްޓާލާފައެވެ.