އާ މަޖިލީހުގެ ހުވާ އަންނަ މަހުގެ ފަހުކޮޅު ކުރުމަށް ހަމަޖެހިފައިވާއިރު އާ މަޖިލީހުން ކުރާނެ ފުރަތަމަ ވެސް ކަމަކީ އިތުބާރު ގެއްލިފައިވާ ބޭފުޅުންގެ އިތުބާރު ނެތް ކަމުގެ ވޯޓު ނެގުން ކަމަށް، ކާށިދޫ ދާއިރާއަށް އިންތިޚާބުވި އަބްދުﷲ ޖާބިރު ވިދާޅުވެއްޖެއެވެ.
ޖާބިރު މިހެން ވިދާޅުވީ، "ރާއްޖެ ޓީވީ" ގެ "ފަށާއިރު" ޕްރޮގްރާމުގައި ބައިވެރިވެވަޑައިގެން ކުރެއްވި ސުވާލަކަށް ޖަވާބު ދެއްވަމުންނެވެ. ޖާބިރު ވަނީ ކޯލިޝަންގެ ބައެއް ޕާޓީތަކަށް ވަރަށް ބޮޑަށް ފާޑު ވިދާޅުވެ އެބޭފުޅުން ފެއިލް ވެފައިވާ ކަމަށް ބުނެފައެވެ.
ބެލެވޭ ގޮތުގައި ޖާބިރު އިޝާރާތް ކުރެއްވީ ކޯލިޝަންގައި ހިމެނޭ ޖުމުހޫރީ ޕާޓީގެ ވަޒީރުންނަށް ކަމަށް ބެލެވެއެވެ. ނަމަވެސް ކޯލިޝަނުން އެފަދަ އެއްވެސް އެއްޗެއް ހާމަކޮށްފައެއް ނުވެއެވެ. ޖާބިރު އިތުރަށް ވިދާޅުވީ މިނިވަން ކެންޑިޑޭޓެއްގެ ގޮތުގައި އިންތިޚާބު ވިޔަސް އޭނާއަކީ އެމްޑީޕީ މީހެއް ކަމަށެވެ.
އަޅުގަނޑަކީ އެމްޑީޕީ މީހެއް، އަޅުގަނޑު މަސައްކަތް ކުރާނީ އެމްޑީޕީ ޕީޖީ ގްރޫޕާ އެކީ. އަޅުގަނޑު އިންތިޚާބުގައި އަމިއްލަ ގޮތުން ވާދަކުރަން ޖެހުނީ އެމްޑީޕީ ކެންޑިޑޭޓެއް ހުރުމުން. ވާދަކުރުމަކީ އަޅުގަނޑުގެ ހައްގެއް އެހެން ނަމަވެސް އަޅުގަނޑަކީ އެމްޑީޕީ މީހެއް،"
ޖާބިރު ވަނީ މި ޕްރޮގްރާމުގައި ބައިވެރިވެވަޑައިގެން ކުރީގެ ރައީސް ޔާމީނާއި ކޯލިޝަންގައި ހިމެނޭ ޖުމުހޫރީ ޕާޓީ އަދި އެޕާޓީގެ ލީޑަރު ގާސިމް އިބްރާހިމަށް ވަރަށް ބޮޑަށް ފާޑުވިދާޅުވެފައެވެ.
އަދި ކާށިދޫ ދާއިރާ ސިޓީއަކަށް ހަދާނެ ކަމަށާއި އެކަމާ މެދު ޝައްކެއް ނެތް ކަމަށް ވެސް ޖާބިރު ވިދާޅުވިއެވެ. މިހާރުވެސް ކާށިދޫގައި ތަރައްގީގެ ޕްރޮޖެކްޓުތައް ފެށިފައިވާ ކަމަށާއި މާލީ ގޮތުން އެކަން ކުރުމަށް އެއްވެސް ހުރަހެއް ނެތް ކަމަށް ޖާބިރު ވިދާޅުވެފައިވެއެވެ.