ކާށިދޫ ދާއިރާގެ ތަރައްގީއާ މެދު ބަޔަކު ސުވާލު އުފައްދާ ކަމަށާއި ނަމަވެސް އެއީ ސުވާލު އުފައްދަން، ޝައްކު އުފައްދަން ޖެހޭ ކަމެއް ނޫން ކަމަށް އެދާއިރާގެ މަޖިލިސް އިންތިޚާބު ކާމިޔާބު ކުރެއްވި ވިޔަފާރިވެރިޔާ އަބްދުﷲ ޖާބިރު ވިދާޅުވެއްޖެއެވެ.
ޖާބިރު ވިދާޅުވީ އެމަނިކުފާނަކީ ބިލިޔަނަރެއް ކަމަށާއި އަބަދުވެސް އެސެޓްތައް ދައުރުވޭވެ ހުންނާނެ ކަމަށެވެ. އަދި ބޭންކު ލޯނެއްވެސް އޭނާގެ ނަމުގައި ނުހުންނާނެ ކަމަށާއި ރާއްޖޭގައި ބޭންކު ލޯނެއް ނެތް ވިޔަފާރިވެރިއެއް މަދުވާނެ ކަމަށް ވިދާޅުވިއެވެ.
ކާށިދޫ ދާއިރާ ތަރައްގީ ކުރާނެ ކަން ދާއިރާގެ ރައްޔިތުންނަށް ވަރަށް ރަނގަޅަށް އެނގޭނެ ކަމަށް ޖާބިރު ވިދާޅުވިއެވެ. އަދި މިހާރުވެސް ބައެއް މަޝްރޫއުތައް ހިނގަމުން ދާ ކަމަށާއި އެކަން ބަލައި ރައްޔިތުންނަށް ހާމަކުރުމަށް ނޫސްވެރިންނަށް ދައުވަތުވެސް އޭނާ ވަނީ އަރުވާފައެވެ.
އިންތިޚާބީ ބަހުސްގައި ޖާބިރު ވަނީ ކާށިދޫ ދާއިރާ، ރާއްޖޭގެ އެއްވެސް ސިޓީއެއް ތަރައްގީ ވެފައި ނެތް މިންވަރަށް ތަރައްގީ ކުރާނެކަމަށް ވިދާޅުވެފައެވެ. ކޭބަލް ކާރުގެ ޒަރިއްޔާއިން ދަތުރުކުރެވޭނެ ގޮތް ހަދާނެ ކަމަށާއި ފެންވަރު ރަނގަޅު ހޮސްޕިޓަލް އަޅައި ފެންވަރު ރަނގަޅު ޔުނިވާސިޓީތައް އެޅުމުން މާލޭ މީހުން ވެސް ދެން ދާންވީ ކާށިދޫ އާ ގާފަރަށް ކަމަށް އޭނާ ވިދާޅުވިއެވެ.