ހޮނިހިރު ދުވަހު ބޭއްވި ރައްޔިތުންގެ މަޖިލީހުގެ އިންތިހާބުގައި ބ. ކެންދޫ ދާއިރާގައި ބެހެއްޓި ވޯޓް ފޮއްޓެއް ބާތިލްކޮށް، އަލުން އެފޮއްޓަށް ވޯޓުލުމަށް އެމްޑީޕީން އިލެކްޝަންސް ކޮމިޝަނުގައި އެދިފި އެވެ.
ރައްޔިތުންގެ މަޖިލީހުގެ އިންތިހާބާ ބެހޭ ޝަކުވާގެ ގޮތުގައި އެމްޑީޕީން އިލެކްޝަންސް ކޮމިޝަނަށް ހުށަހަޅާފައިވާ ޝަކުވާއަކީ ކެންދޫ ވޯޓުލާ މަރުކަރުގައި ބެހެއްޓި ވޯޓު ފޮށި ނަމްބަރު F03.03.1، ވޯޓު ފޮއްޓާ ގުޅޭ ޝަކުވާތަކެކެވެ.
އެމްޑީޕީން ހުށަހެޅި ޝަކުވާތަކުގައި ތެރޭގައި ހިމެނެނީ، ވޯޓް ފޮއްޓަށް ގަޑިއަކު އެއްފަހަރު ވޯޓު ލަމުންދާ މީހުންގެ ތަފްސީލް ހާމަކުރަން އޮންނަ އުސޫލުގެ ދަށުން މެންދުރު 02:00 ގައި ވޯޓް ފޮއްޓަށް ވޯޓްލި ކަމަށް އިއުލާން ކުރީ 377 މީހުން ކަމަށާއި
އޭރު ކިޔު ނަމްބަރު 377 ވޯޓުލާފައި ނުވާކަމަށާއި ވޯޓުލާފައިވާ މީހުންގެ ކިޔޫ ނަމްބަރަށްވުރެ އިތުރަށް އެ ވޯޓް ފޮއްޓަށް ވޯޓުލާފައިވާކަން އެވަގުތު އެ ވޯޓު ފޮއްޓާ ހަވާލުވެހުރި ވެރިޔާގެ ސަމާލުކަމަށް ގެނައި ނަމަވެސް ވޯޓުލުން ކުރިއަށް ގެންދިއުން ހިމެނޭ ކަމަށެވެ.
އެ ޝަކުވާގައި ބުނެފައިވާ ގޮތުން ވޯޓު ފޮށި ކައިރީ އޮންނަ ޝީޓާއި ވޯޓާސް ލިސްޓާއި އިނގިލީގައި ފާހަގަޖަހާފައި މާކުކުރާ ލިސްޓާއި ކިޔު ނަމްބަރު ދޫކުރި ލިސްޓާއި އެއްޝީޓް އަނެއް ޝީޓް ދިމާ ނުވާކަމަށެވެ.
މީގެއިތުރުން ވޯޓްލާފައިވާ ކަމަށް ބުނެ މާކުކޮށްފައިވާ ލިސްޓްގަިއ ވޯޓްލާން ގޮސްފައިނުވާ މީހުންގެ ނަމާ ދިމާލުގައި މާކު ކޮށްފައި ހުރުމާއި 18:00 ގައި، ވޯޓުލުން ބަންދުކުރިފަހު، ވޯޓްލާ މަރުކަޒުގެ އޮފިޝަލެއް 18:03ގައި ވޯޓުލާފައި ވުމާއި، ވޯޓު ކަރުދާސްކޮޅުތަކުގެ ކައުންޓާ ފޮއިލްކޮޅުތަކާއި ބާކީ ހުރި ވޯޓު ކަރުދާސްތައް ދައްކާފައިނުވާ ކަމަށްވެސް އެމްޑީޕީން ހުށަހަޅާފައިވާ ޝަކުވާގައި ވެއެވެ.
އެ ޝަކުވާގައި ބުނެފައިވާ ގޮތުގައި އެ ވޯޓު ފޮށީގެ މައްސަލަ ދިމާވަން ފެށީ، ކެންޑީޑޭޓް އަލީ ހުސައިން ވޯޓްލުމަށް ވޯޓްލާ މަރުކަޒަށް ވަތްފަހުން ކަމަށާއި އޭނާއަށް ލިބިލެއްވި ކިޔޫ ނަމްބަރަކީ 377 ކަމަށެވެ.
އެމްޑީޕީން ބާތިލް ކުރަން އެދުނު އެ ވޯޓު ފޮށީގެ ނަތީޖާ ދައްކާގޮތުން އަލީ ހުސައިންއަށް 287 ވޯޓް ލިބިލައްވާފައި ވެއެވެ. އެމްޑީޕީގެ ކެންޑިޑޭޓަށް 66 ވޯޓް ލިބިލައްވާފައިވާއިރު، އަމިއްލަ ކެންޑިޑޭޓް އަހުމަދު ރިޒާއަށް 141 ވޯޓް ލިބިލައްވާފައި ވެއެވެ.
ވަގުތީ ނަތީޖާއަށް ބަލާއިރު، ޖޭޕީގެ ކެންޑިޑޭޓް އަލީ ހުސައިން އިންތިހާބު ވެފައި ވަނީ 929 ވޯޓުން ނެވެ. އެމްޑީޕީގެ ކެންޑިޑޭޓަށް ލިބިފައިވަނީ 802 ވޯޓެވެ. އަމިއްލަ ކެންޑިޑޭޓް އަހުމަދު ރިޒާއަށް 700 ލިބިފައި ވެއެެވެ.
ކެންދޫގައި ބެހެއްޓި އެ ވޯޓު ފޮށި ބާތިލު ކުރުމަށް އެމްޑީޕީން އިލެކްޝަންސް ކޮމިޝަނަށް ހުށަހެޅި އިއްޔެ އެވެ. އަދި ކޮމިޝަނުން ވަކިގޮތެއް ނުނިންމަ އެވެ.
ވަގުތީ ނަތީޖާ ދައްކާގޮތުން ކެންދޫ ދާއިރާގެ އިންތިހާބު ކާމިޔާބު ކުރައްވާފައިވަނީ ޖުމްހޫރީ ޕާޓީގެ ކެންޑިޑޭޓް އަލީ ހުސައިން އެވެ.