ކޮލަމްބޯ އާއި ސ. ގަމާއި ދެމެދު ސްރީލަންކަންއިން ކުރާ ދަތުރު ނުހުއްޓި ކުރިއަށްދާނެކަމުގެ ޔަގީންކަން ޓޫރިޒަމް މިނިސްޓަރ އަލީ ވަހީދު ދެއްވައިފިއެވެ.
ޓޫރިޒަމް މިނިސްޓްރީގައި މިއަދު ހެނދުނު ބޭއްވި ނޫސް ކޮންފަރެންސްގައި އަލީ ވަހީދު ވިދާޅުވީ ގަން އިންޓަނޭޝަނަލް އެއާޕޯޓަށް ސްރީލަންކަންއިން ކުރަމުންދާ ދަތުރު ނުހުއްޓޭނެކަމަށާއި، ވަރަށް އަވަހަށް ގަމަށް ސައުތު އެޕްރިކަން އެއާލައިންސް އޮޕަރޭޓު ކުރަން ފަށާނެކަމަށެވެ.
ގަމާއި ކޮލަމްބޯ އާއި ދެމެދު 2017 ޑިސެމްބަރ މަހުގެ 1 ވަނަ ދުވަހު އޮޕަރޭޓު ކުރަން ފެށި ސްރީލަންކަން އެއާލައިންސްގެ ދަތުރުތައް ބައެއް ކަންކަން ހަމަނުޖެހުމުގެ ސަބަބުން ހުއްޓާލަން ޖެހިދާނެކަމަށް މީގެ މަހެއްހާ ދުވަސްކުރިން ސްރީލަންކަންއިން ވަނީ ބުނެފައެވެ. އެކަމާއި ގުޅިގެން ސަރުކާރާއި ސްރީލަންކަން އާއި ދެމެދު މަޝްވަރާ ކުރުމަށްފަހު އެއާލައިންއިން އެދުނު ކަންކަން ސަރުކާރުންވަނީ ފަހިކޮށްދީފައެވެ.
ސަރުކާރުން މިހާރުވަނީ އަލަށް ރާއްޖެ ވަޒީފާއަށް އަންނަ ބިދޭސީންނާއި ބިޒްނަސް ވިސާގައި އަންނަ ފަރާތްތަކަށް ގަމުން ވިސާ ލިބޭނެ އިންތިޒާމް ހަމަޖައްސާފައެވެ.
އަލީ ވަހީދު ވިދާޅުވީ ވަރަށް އަވަހަށް ގަމާއި، ފުވައްމުލައް އަދި ހުވަދޫއަށް ވަކި ތަރުތީބެެއްގެ ދަށުން އެތެރޭގެ އުދުހުން ހަަމަޖެއްސުމަށް އެއާލައިންތަކާއި އެކު މަސައްކަތް ކުރަމުންދާ ކަމަށެވެ. އެއާއިއެކު ގަން އިންޓަނޭޝަނަލް އެއާޕޯޓަށް އިތުރު ކުރިއެރުން ލިބިގެންދާނެކަމަށް އަލީ ވަހީދު ވިދާޅުވިއެވެ.
ސްރީލަންކަންއިން އަންނަނީ ހަފްތާއަކު 3 ފްލައިޓު ގަމަށް ބާއްވަމުންނެވެ.