ރައްޔިތުންގެ މަޖިލީހުގެ 87 ދާއިރާގެ ތެރެއިން އަންހެނުންނަށް އެންމެ ހަތަރު ގޮނޑި ލިބިގެން ދިޔުމަކީ ހިތާމައެއް ކަމަށް މިނިސްޓަރު އޮފް ޖެންޑަ، ފެމިލީ އެންޑް ސޯޝަލް ސަވިސަސް ޝިދާތާ ޝަރީފް ވިދާޅުވެއްޖެއެވެ.
ނެޝަނަލް ބިއުރޯ އޮފް ސްޓެޓިސްޓިކްސްގެ ފަރާތުން ޗަންޕާ ސެންޓްރަލް ހޮޓަލްގައި މިއަދު ކުރިއަށް ގެންދިޔަ “ވޯކްޝޮޕް އޮން އެޑްރެސިން ޖެންޑަ ސްޓެޓިސްޓިކްސް ގެޕްސް” ހުޅުވުމުގެ ރަސްމިއްޔާތުގައި ވާހަކަ ދައްކަވަމުން މިނިސްޓަރު ޝިދާތާ ވިދާޅުވީ ،ރައްޔިތުންގެ މަޖިލީހުގެ ދައުރުތަކުގެ ތެރޭގައި ސަރުކާރު ޖަވާބުދާރީ ކުރުވުމާއި، ގާނޫނު ހެދުމާއި، ރައްޔިތުންގެ މަސްލަހަތު ހިމެނޭ ކަންކަމުގައި ވަކާލާތުކުރުން ހިމެނޭ އިރު، ރައްޔިތުންގެ މަޖިލީހުގެ ތެރެއިން ގައުމީ ސިޔާސަތުތައް ކަނޑައެޅިގެން ދާނީ އަންހެނުންގެ އެކަށީގެންވާ މިންވަރެއްގެ ބައިވެރިވުން ނެތި ކަމަށެވެ.
ނަމަވެސް، އެ ގޮންޖެހުންތަކާއެކު ވެސް މިންތީގެ ހަމަހަމަކަން ގާއިމުކުރުމާއި، އަންހެނުން ބާރުވެރިކުރުވުމާއި، ވަކިން ހާއްސަ ގޮތެއްގައި ހައިހޫނުކަން ނައްތައިލުމުގައި އަންހެނުންގެ ދައުރު އިތުރުކުރުމާއި، އަންހެނުން ވިޔަފާރިއާއި ސިޔާސީ މައިދާނުގައި ބާރުވެރިކުރުވުމަށް ސަރުކާރުން ކުރަމުންގެންދާ މަސައްކަތްތައް ދަމަހައްޓާނެ ކަމަށް މިނިސްޓަރު ޝިދާތާ ވިދާޅުވިއެވެ.
ދިވެހިރާއްޖޭގައި ގައުމީ ސިޔާސަތުތަކާއި ގާނޫނުތައް އެކުލަވައިލުމުގައި ތަފާސް ހިސާބުގެ ބޭނުން އެންމެ ފުރިހަމައަށް ހިފިގެން ނުދާ ކަމަށާއި އެއީ ބައެއް ދާއިރާތަކުން އެންމެ އެކަށީގެންވާ މިންވަރަށް މުޖުތަމައު ކުރިއަރައި ނުދިޔުމުގެ ސަބަބުތަކުގެ ތެރެއިން އެއް ސަބަބު ކަމަށް ވެސް މިނިސްޓަރު ޝިދާތާ ވިދާޅުވިއެވެ.
މިނިސްޓަރު ޝިދާތާ ވިދާޅުވި ގޮތުގައި މިންތީގެ ތަފާސްހިސާބު ވިލަރެސްކުރާ ފަރާތްތަކާއި އޭގެ ބޭނުން ހިފާ ފަރާތްތަކުގެ ދެމެދުގައި ބަދަހި ގުޅުމެއް އުފައްދަން ޖެހެއެވެ. އަދި އެ ފަރާތްތަކުގެ ދައުރު ކަނޑައެޅި ބަޔާންކުރެވިގެން މެނުވީ މިންތީގެ ތަފާތުކުރުންތައް ނައްތައިނުލެވޭނެ ކަމަށް މިނިސްޓަރު ޝިދާތާ ވިދާޅުވިއެވެ.
މި މަހު 6 ވަނަ ދުވަހު ބޭއްވި މަޖިލީސް އިންތިހާބު ގައި 87 ދާއިރާ އަށް ޖުމްލަ 35 އަންހެނުން ވާދަކުރިއިރު، މަޖިލިސް އިންތިހާބު ކާމިޔާބުކުރީ އެންމެ ހަތަރު މެންބަރުންނެވެ. އެގޮތުން މަޖިލީސް ކާމިޔާބު ކުރި 4 އަންހެން މެމްބަރުންނަކީ ގަލޮޅު އުތުރު ދާއިރާ އަށް އީވާ އަބްދުﷲ، ހިންނަވަރު ދާއިރާއަށް ޖީހާން މަހުމޫދު، އައްޑޫ މީދޫ ދާއިރާއަށް ރޮޒައިނާ އާދަމް އަދި ތުޅާދޫ ދާއިރާ އަށް ހިސާން ހުސައިން އެވެ. މިއީ މުޅިންވެސް ވެރިކަންކުރާ މައިޕާޓީ އެމްޑީޕީގެ ކެންޑިޑޭޓުންނެވެ.