އައްޑޫ ސިޓީ ހިތަދޫގައި ހުންނަ އީހަބް ފިހާރަ ފަޅާލައި ވައްކަން ކުރި މައްސަލާގައި ހަތަރު މީހަކު ފުލުހުން ހައްޔަރުކޮށްފިއެވެ.
ފުލުހުން ބުނީ އިއްޔެ ފަތިހުގެ 4:02 ހާއިރު މި މައްސަލަ ފުލުހަށް ރިޕޯޓް ކޮށްފައިވަނީ އާންމުންގެ ފަރާތަކުން ކަމަށާއި މި މައްސަލައާ ގުޅިގެން ކޯޓު އަމުރެއްގެ ދަށުން ހަތަރު ގެއެއް ބަލައި ފާސްކޮށް ހަތަރު މީހަކު ހައްޔަރުކޮށްފައިވާ ކަމަށެވެ. ނަމަވެސް އެ 4 މީހުންގެ މަޢުލޫމާތު ފުލުހުން ހާމަކޮށްފައެއް ނުވެއެވެ.
އެ ފިހާރައިގެ ސީސީޓީވީ އިން ފިހާރަ ފަޅާލައި ވައްކަން ކުރި ވީޑީއޯއެއް ސޯޝަލް މީޑިއާގައި މިހާރު އަންނަނީ ވައިރަލް ވަމުންނެވެ. އެ ވިޑިއޯއިން ފެންނަނީ ހަތަރު މީހަކު މަގުގެ އެއްފަރާތުން ބާރު ހިނގުމެއްގައި އައިސް އޭގެތެރެއިން ތިން މީހަކު އަތުގައި އޮތް އެއްޗަކުން ޖަހާ ފިހާރައިގެ މައި ދޮރާ ދިމާއަށް ހޫރާލާތަނެވެ.
ތިން ޒުވާނުން އަތުގައި އޮންނަ އެއްޗަކުން ޖެހުމުން ފިހާރައިގެ މައިދޮރުގެ ބިއްލޫރި ތަޅައިގެންދާ އަޑު ސާފުކޮށް އެ ވީޑިއޯއިން އިވެއެވެ.
ދެން ފެންނަނީ އެ ފިހާރައިގެ އެތެރެއަށް އޭގެތެރެއިން ދެމީހަކު ވަންނަ ތަނެވެ. އަނެއް ދެމީހުން ތިބެނީ ބޭރުގައި މަޑުކޮށްގެން ފާރައަށެވެ. އެތެރެއަށް ވަންނަ ދެ ޒުވާނުން އެ ފިހާރަ ތެރޭގައި ހުރި ޝޯކޭސްތައް ހަލާކުކޮށްލާ އަދި އެތަނުން އެކަކު "ނަން ނުކިއުމަށް" ބުނާ އަޑު އެ ވީޑިއޯއިން އިވެއެވެ. އަދި އަވަސް ކުރުމާއި އެ ޝޯކޭސް "ތަޅާ ފުނޑާލަން" ވެސް ބުނާ އަޑު އިވެއެވެ.
މޫނު ނިވާކޮށްގެން ތިބި ހަތަރު މީހަކު އީހަބް ފިހާރަ ތެރެއަށް ވަދެ އެ ފިހާރައަށް އެކިވަރުގެ ގެއްލުން ދީފައިވަނީ އިއްޔެ ރޭ ދަންވަރު 3:56 ހާއިރެވެ.
ފޯނާއި ޕްރިންޓަރު އަދި އެހެނިހެން ވެސް ގިނަ އިލެކްޓްރޯނިކް ސާމާނު ވިއްކާ އީހަބަކީ ހިތަދޫއަށް މަޝްހޫރު ފިހާރައެކެވެ.