ގަމުގެ ވައިގެ ބަނދަރުގެ ރަންވޭ ދިގުކުރުމަށް ބިން ހިއްކުމަށް ގަލްފު ކޮބްލާއިން ގެނައި ކޮންނަ ބޯޓު އިއްޔެ ގަމާއި ފޭދޫ އާ ދޭތެރެއިން ވެއްދުމަށް ގެންދިއުމަށް ފަހު އަނެއްކާވެސް ގެނެސް ފޭދޫ ބަނދަރަށް ވައްދައިފި އެވެ.
އިއްޔެ ހަވީރު ގަމުގެ ވައިގެ ބަނދަރުގެ އެރައިވަލް ޓާމިނަލްގައި ގަން އެއާޕޯޓް މަޝްރޫއު ރައީސް ވަޙީދު ފައްޓަވާ ދެއްވީ ރިމޯޓަކުން ކޮންނަ ބޯޓުން ކޮނުމަށް ފަހު އެވެ.
ރައީސް ރިމޯޓަށް ފިއްތަވާލެއްވުމުން ކޮންނަ ބޯޓުން ކޮންނަން ފެށި މަންޒަރު އެތަނުގައި ބަހައްޓާފައި ހުރި ބޮޑު ޓީވީ ސްކްރީނުން ފެނުނެވެ. އަދި ރަސްމިއްޔާތުގައި މަޝްރޫއު ފެށުނު ކަމަށް ރައީސްވަނީ އިއުލާންކޮށްފަ އެވެ.
އިއްޔެގެ ރަސްމިއްޔާތު ކުރިއަށް ގެންދިޔައިރު ކޮންނަ ބޯޓު އޮތީ ގަމުގެ އެއާޕޯޓްގެ ވީއައިޕީ ބަނދަރާ ދިމާ ބޭރުގައި އެވެ.
އައްޑޫ އިންޓަނޭޝަނަލް އެެއާޕޯޓް (އޭއައިއޭ) އިން ބުނީ ބޯޓު ގަމާއި ފޭދޫ އާއި ދޭތެރެއަށް ވެއްދުމަށް ހަމަޖެހިފައިވަނީ ވިލިނގިލި އާއި ގަމާއި ދޭތެރެއިން ބޯޓަށް ވަދެވޭ ވަރުގެ ޗެނެލްއެއް ކޮނެގެން ކަމަށެވެ. އަދި އެކަމަށް ބޭނުންވާ ހުއްދަ އިއްޔެ އީޕީއޭ އިން ދޭނެކަމަށެވެ.
އީޕީއޭގެ އޮފިޝަލަކު ވިދާޅުވީ އިއްޔެ އެސަރަހައްދު ކޮނުމުގެ ހުއްދަ ދީފައިވާ ކަމަށެވެ. ނަމަވެސް ކޮންނަ ބޯޓު ގެނެސް ފޭދޫ ބަނދަރަށް ވެއްދި ސަބަބެއް އަދި ސާފެއް ނުވެ އެވެ. ކޮންނަ ބޯޓް ރޭ ފޭދޫ ބަނދަރަށް ވެއްދީ 9:00 ޖަހާ އެހާކަށްހާ އިރު އެވެ.