މިއަހަރުގެ ފެބްރުއަރީ މަހުގެ 22 ވަނަ ދުވަހު ޑިންގީއެއްގައި ދަތުރުކުރަނިކޮށް ކަނޑަށް ގެއްލުނު ލ. މާމެންދޫ އާމިނަތު ޝިމާގެ އެއްވެސް ޚަބަރެއް ނުވަނީސް އޭނާގެ 16 އަހަރުގެ އަންހެން ކޮއްކޮ ގޮވައިގެން ޑިންގީއެއްގައި ފިލަން އުޅެނިކޮށް ފުލުހުން ހުއްޓުވައި ހައްޔަރުކުރި އިބްރާހިމް ފަޒީލާއި އޭނާއާއެކު ދިޔަ ދެ ފިރިހެނުންވެސް ކޯޓުން ދޫކޮށްލައިފިއެވެ.
މި ތިން މީހުން އިއްޔެ ގަމު މެޖިސްޓްރޭޓް ކޯޓަށް ގެންދިޔައީ އެމީހުންގެ ބަންދާ މެދު ގޮތެއް ނިންމުމަށެވެ. ނަމަވެސް ކޯޓުން ވަނީ ބަންދުގެ މުއްދަތު އިތުރު ނުކޮށް ޝަރުތުތަކަކާ އެކު ތިން މީހުންވެސް މިނިވަން ކޮށްފައެވެ. ނަމަވެސް އެއީ ކޮން ޝަރުތުތަކެއް ކަމެއް ފުލުހުން ހާމަކޮށްފައެއް ނުވެއެވެ.
ގަމުން މާމެންދުއަށް ޑިންގީއެއްގައި ދަތުރުކުރަނިކޮށް ޑިންގީ ބަންޑުން ޖަހާލި ހާދިސާގައި އޭގައި ދަތުރުކުރި ޝިމާ ގެއްލިފައިވާއިރު ދެން ދަތުރުކުރި ފަޒީލް ވަނީ އެހީ ހޯދުމަށް ސިކްސް ސެންސަސް ލާމު ރިސޯޓަށް ފަތާފައި އަރާފައެވެ. އޭނާ ބުނީ ޝިމާއަށް ފަތަން ނޭނގޭތީ ކަނޑުގައި އުފުލި އޮންނާނެ ގޮތަށް ހަމެއްގެ މަތީގައި ޝިމާ ބައިންދާފައި ފޯނެއްވެސް ދިން ކަމަށެވެ.
މިމައްސަލަ މިހާރު ފުލުހުން ތަހުގީގު ކުރަމުން އަންނައިރު މިހާތަނަށް އެއްވެސް ތަފްސީލެއް ދީފައެއް ނުވެއެވެ. އެމްއެންޑީއެފުން ވަނީ ޝިމާ ގެއްލުނު ސަރަހައްދު ވައިގެ މަގުންނާއި ފީނައިގެން އަދި ރޮބޮޓު ބޭނުން ކޮށްގެން ވެސް ހޯދާފައެވެ. އެއްވެސް ތަނަކުން ޝިމާގެ ހިލަމެއް ވެފައިނުވާކަން ފާހަގަކޮށްލެވެއެވެ.