މިދިޔަ ހޮނިހިރު ދުވަހު މުޅި ރާއްޖޭގައި ބޭއްވި ރައްޔިތުންގެ މަޖިލިސް އިންތިޚާބުގައި އެހެން އަހަރުތަކާ ޚިލާފަށް މިފަހަރު ބާތިލު ވޯޓު ގިނަވެފައިވަނީ އިންތިޚާބުގެ ވޯޓުލުން ކައިރިވެފައިވަނިކޮށް ގާނޫނަށް ބަދަލު ގެނައުމުގެ ސަބަބުން ކަމަށް އިލެކްޝަންސް ކޮމިޝަންގެ ރައީސް އަހުމަދު ޝަރީފް ވިދާޅުވެއްޖެއެވެ.
އެޕްރިލް 6 ވަނަ ދުވަހު ވޯޓުލާން ކަނޑައަޅާފައިވާއިރު މާޗު މަހުގެ 04 ވަނަ ދުވަހު ހުޅުދޫ ދާއިރާގެ މެމްބަރު މުހައްމަދު ޝާހިދު ހުށައެޅުއްވި އިސްލާހެއް މަޖިލީހުން ވަނީ ފާސްކޮށްފައެވެ. އެ އިސްލާހުގައި ވަނީ ވޯޓު ކަރުދާހުގައި އެ މީހަކަށް ފެންނަ ކެނޑިޑޭޓެއްގެ ނަމާ ދިމާލުގައި ރަނގަޅު ފާހަގަ ޖެހުމުގެ އިތުރުން އިތުރު އެހެން ފާހަގައެއް ނުވަތަ ލިޔުމެއް ނުވަތަ ކުރެހުމެއް ކުރަހައިފިނަމަ އެ ވޯޓު ބާތިލު ވާނެ ކަމަށެވެ.
ވޯޓުގައި ބައިވެރިވި 53 މެމްބަރުންގެ އިއްތިފާގުން މި އިސްލާހު ފާސްވެފައިވާއިރު މީގެ ކުރިން، މަޖިލީހުން މި އިސްލާހަށް ބަދަލު ގެނެސް ވޯޓު ބާތިލުނުވާ ގޮތަށް ވެސް ހެދީ ޕީޕީއެމުންނެވެ.
ރައީސުލް ޖުމުހޫރިއްޔާ ވަނީ އިސްލާހު ފާސްކުރުމުން މާޗު 12 ގައި މި އިސްލާހު ތަސްދީގު ކުރައްވާފައެވެ. ވޯޓާ އެހާ ކައިރިވެފައިވަނިކޮށް ގާނޫނަށް ބަދަލު ގެނައުމުން ވަރަށް ގިނަ ވޯޓު ފޮށިތަކުގައި ވަނީ ސައްހަ ވޯޓުވެސް ބާތިލު ވޯޓުގެ ގޮތުގައި ގުނާފައެވެ.
ފަސް ވޯޓު ފޮށްޓެއް އަލުން ގުނާފައިވާއިރު ހޮވުނު ކެންޑިޑޭޓަކަށް ބަދަލެއް އައިސްފައެއް ނުވެއެވެ. އިލެކްޝަންސް ކޮމިޝަނުން ވަނީ އިންތިޚާބުގެ ދާއިމީ ނަތީޖާތައް މާދަމާ އިއުލާން ކުރާނެ ކަމަށް ބުނެފައެވެ.