ރައްޔިތުންގެ މަޖިލީހަކީ ރައްޔިތުންގެ ހައްޤުގައި މަސައްކަތް ކުރުމަށް ރައްޔިތުން ހޮވާފައި ތިބޭ ބައެކެވެ. ނަމަވެސް މިހާރު އަޅުގަނޑުމެންނަށް ފެނިގެން ދަނީ ރައްޔިތުން ހޮވާފައި ތިބޭ ބައެއް "އިއްޒަތްތެރި" މެމްބަރުން ރައްޔިތުންގެ މޫނުގައި
"އެތި ފަހަރެއް" ޖަހާ މަންޒަރެވެ.
އެތައް ރައްޔިތުންނެއް ފޮނި އުއްމީދުތަކާ އެކު ހޮވާފައި މަޖިލީހަށް ވެއްދުމުން، އެއްކަލަ މިބުނާ "އިއްޒަތްތެރި" ބައެއް މެމްބަރުން ވަގުތުން ވެސް އުޅެން ފަށަނީ އެ ބޭފުޅުންގެ "އަތްމަތި" ތަނަވަސް ކުރެވޭނެ ގޮތެއް ހޯދުމަށެވެ.
އެ އިއްޒަތްތެރި މެމްބަރުން ކުރައްވައިގެން ތިއްބެވި ހުވައިގައި ޕާޓީ އަށް ވަފާތެރި ވުމަށް ނެތްކަމީ މިކަމުގެ ވަރަށް ބޮޑު ހެއްކަކެވެ. މަޖިލީހަށް ކަމެއް ހުށަހަޅާ އިރަށް ޖެއްސުންކޮށް މެމްބަރުން ވަގުތުތައް ހޭދަ ކުރައްވަނީ އެކިއެކި ޒުވާބުތަކުގަ އެވެ.
ހަފްތާ އަކު 3 ފަހަރު ޖަލްސާތައް ބާއްވަމުން މަޖިލިހުގެ މެމްބަރަކަށް މުސާރަ އާއި މާލީ އިނާޔަތްތަކުގެ ގޮތުގައި މަހަކު 62،500 ރ. ލިބިވަޑައިގަންނަވާ އިރު ވެސް، ގިނަ ފަހަރަށް ކޯރަމް ހަމަނުވެގެން ޖަލްސާތައް ކެންސަލް ކުރައްވާތަން އެބަ ފެނެ އެވެ. ޖަލްސާ އަށް ވަޑައިގަތަސް ނުވަތަ ކެމްޕޭން ކުރައްވަން ވަޑައިގަތަސް ބަރާބަރަށް މުސާރަ ލިބެއެ ވެ.
އަގު ބޮޑެތި ކާރައި، މާލެއިން އެތައް ގޯއްޗެއްގެ އިތުރުން ބައެއް ބޭފުޅުން ބޮޑެތި މަސްދޯނިތައް ވެސް މި ވޭތުވެ ދިޔަ ދުވަސްތަކުގައި ގަނެފައި އެބަހުއްޓެވެ.
ޕާޓީތައް ބަދަލުކުރަނީ މިފަދަ ކަންތައްތައް ކުރުމަށް ފަސޭހަ ވާނެތީ ކަމަށް ވެސް ވެދާނެ އެވެ. އެއް ޕާޓީން އަނެއް ޕާޓީ އަށް ބަދަލުވެވި ބައެއް މެމްބަރުންވަނީ ޕާޓީތަކަށް "ތިންފަތް" ވެފައޭ ދެންނެވުމުން ދޮގަކަށް ނުވާނެ އެވެ.
ހިތާއި ރޫޙުންނާއި، މިޝަންއެއްގެ ބޭނުމުގައި، ނުވަތަ ވާރުތަ މުދާ ދޫކޮށްލާފައި ކަމަށް ވެސް ބައެއް އިއްޒަތްތެރި މެމްބަރުން ދަނީ ޖަލްސާތަކުގެ ޕޯޑިއަމްތަކުގައި ޕާޓީ ބަދަލުކުރެއްވި ސަބަބުތައް ޕާޓީގެ މެމްބަރުނަށް ޖޯޝާއި ފޯރީގައި ވަނީ ކިޔައި ދެއްވާފަ އެވެ.
ކަންމިހެން އޮތް އިރު އެ ބޭފުޅުން ސީދާ "ކުލަ" ބަދަލު ކުރެއްވީ ބޮޑެތި އަދަދުތަކުން ފައިސާ އާއި ބޮޑެތި ހުށަހެޅުންތައް ލިބިގެން ކަމަށް ގިނަ ފަރާތްތަކުން ދަނީ ބުނަމުންނެވެ.