އިއްޔެ ކުޅުދުއްފުށީ ޒޯން ސްޓޭޑިއަމްގައި ފެށި "18 ވަނަ އެޓޯލް އިންޓަ ސްކޫލް އެތުލެޓިކްސް މީޓް" ގައި 17 އަހަރުން ދަށުގެ އުމުރު ފުރައިގެ ފިރިހެން ކުދިންގެ ބައިން އެއް ވަނާގައި ޝަރަފުއްދީން ސްކޫލް ހިފަހައްޓައިފި އެވެ.
އިއްޔެ އޮތް 17 އަހަރުން ދަށުގެ ފިރިހެން 100 މީޓަރު ދުވުމުން ޝަރަފުއްދީންގެ ހުސެއިން ޝަހުދާން ފަހުމީ ރޭސް ނިންމީ 11.5 ސިކުންތުންނެވެ. އަދި އެރޭހުގެ ދެވަނަ ހޯދި އިބްރާހިމް އަމީން ހަސަން ދީދީ ރޭސް ނިންމާފައިވަނީ 11.9 ސިކުންތުންނެވެ. ތިންވަނަ މާދިހް ހަސަން ނިންމީ 12.2 ސިކުންތުންނެވެ.
އަދި އިއްޔެ ކުރިއަށްދިޔަ 800 މީޓަރ ދުވުމުންވެސް ޝަރަފުއްދީން ވަނީ ގޯލްޑް މެޑެލް ކާމިޔާބްކޮށްފަ އެވެ.
އަދި މިއަދު ހެނދުނު ދަންފަޅީގައި ކުރިއަށްދިޔަ 200 މީޓަރ ދުވުމުގެ ހީޓް ތަކުންވެސް ޝަރަފުއްދީންގެ ދުވުންތެރިން ވަނީ 1، 2 ވަނަ ހޯދާފަ އެވެ.
ޝަރަފުއްދީން ސްކޫލުން މި މުބާރާތަށް ފޮނުވާފައިވަނީ ޖުމްލަ 4އެތްލީޓުންނާއި 2 އޮފިޝަލުންނެވެ. އެއީ 17 އަހަރުން ދަށުގެ ލޯންގް ޖަމްޕްގައި ބައިވެރިވާނެ އެތްލީޓެއްގެ އިތުރުން ދުވުމުގެ އިވެންޓްގައި ބައިވެރިވި ތިން ދުވުންތެރިންނެވެ.