ފޭދޫ ޔޫތު ކޮމިއުނިޓީން މި މަހުގެ 18 ވަނަ ދުވަހު ފަށާ "ފްލައި މީ އައްޑޫ ފުޓްސަލް ޗެލެންޗް 2013" ގެ ހުޅުވާ މެޗްގައި ބައްދަލު ކުރާ ދެ ޓީމަށް މަރަދޫ ގޯދިއްޔާ އާއި ދި ފޭދޫ ހަމަޖެހިއްޖެ އެވެ.
ފޭދޫ ސްކޫލްގައި ރޭ ކުރިއަށް ގެންދިޔަ މުބާރާތުގެ ގުރުލުމުގެ ރަސްމިއްޔާތުގައި ބައިވެރިވި 12 ޓީމް ވަނީ ތިން ގްރޫޕަކަށް ބަހާލާފައެވެ. އެގޮތުން ގްރޫޕް އޭގައި ހިމެނެނީ ގޯދިއްޔާ، ދަ ފޭދޫ، ފޭދޫ އެސްއެމްޓީ އާއި ގޭން އިންޓަނޭޝަނަލް އެއާޕޯޓް ޓީމެވެ.
ގްރޫޕް ބީގައި ހިމެނެނީ ހިތަދޫ ޔަޝީ، މަލްޓީ ޖީނިއަސް ސިޓީ، ފޭދޫ ޔަންގް މެޖެންޓާ، އަދި ފޭދޫ ހޫރު ޝަހަރެވެ.
ގްރޫޕް ސީގައި ހިމެނެނީ އެފްސީ ކަންމަތި، އަބާނީ، އަދި މައިލޯ ސިޓީ ޔުނައިޓެޑް އަދި މެޖެންޓާ އެވެ.
ރޭ ގުރުލުމުގެ ރަސްމިއްޔާތު ކުރިއަށް ގެންދަމުން މުބާރާތުގެ ޗެއާމަން އަހުމަދު ޝަރީފް (ޑުންގާ) ވިދާޅުވީ މި މުބާރާތަކީ އެފްވައިސީގެ ފުރަތަމަ މުބާރާތަށް ވެފައި މައްސަލަތަކެއް ހުރެ ދާނެކަމަށެވެ. ނަމަވެސް ހުރިހާ ޓީމުތަކުންވެސް ޖަމިއްޔާއަށް އެހީތެރިކަން ފޯރުކޮށްދީ ކުޅިވަރުގެ ރޫހާއި އެއްގޮތަށް މުބާރާތް ކުރިއަށް ގެންދިއުމަށް އެހީތެރިވެ ދިނުމަށެވެ.
އެގޮތުން ރާއްޖޭގެ ފުޓްބޯޅައިގައި އައްޑޫ އަކީ އަބަދުވެސް ފާހަގަކޮށްލެވޭ ތަނެއްކަމަށް ވިދާޅުވެ އެންމެ ފުރަތަމަ ފުޓް ބޯޅަ ބޫޓެއް ލައިގެން ކުޅެން ނިކުތީ އައްޑޫ ކަން ޑުންގާ ފާހަނގަ ކުރިއެވެ. އަދި އައްޑޫގެ ފުޓްބޯޅަ ކުރިއެރުވުމުގައި ގޯދިއްޔާ ޖަމިއްޔާ އިން ކުރަމުންދާ މަސައްކަތް ފާހަނގަކޮށް އެ ޖަމިއްޔާ އަށް އެއްބާރު ލުން ދިނުމަށް ޓީމުތަކަށް ގޮވާލެއްވި އެވެ.
ރޭގެ ގުރުލުމުގައި ޑުންގާ ބުނީ ތިން ގްރޫޕަަށް މުބާރާތް ބަހާލުމުން ސެމީއަށް ދާނީ ތިން ގުރޫޕްގެ އެއްވަނަ އަށް ދާ ތިން ޓީމެވެ. އަދި ސެމީގެ 4 ވަނަ ޓީމް ހޮަވަނީ ކޮންމެ ގުރޫޕެއްގެ 2 ވަނަ ޓީމް ތަކުގެ ތެރެއިން އެންމެ މޮޅު ޓީމް ( ބެސްޓް ސެކެންޑް) ޓީމްގެ ގޮތުގަ ސެމީ އަށް ދާ ގޮތަށެވެ.
މުބާރާތުގެ މެއިން ސްޕޮންސަރަކީ ފްލައި މީ އެވެ. ކޯސްޕޮންސަރަކީ އެސްޓީއޯގެ ކުރުގާ ކޮފީ އެވެ. ރިސޯޓް ޕާޓްނަރަކީ ޝަންގްރިއްލާ އެވެ.
މުބާރާތުގެ ޓެލެކޮމް ޕާޓްނަރަކީ ވަތަނިއްޔާ އެވެ.އަދި މުބާރާތުގެ މީޑިއާ ޕާޓްނަރަކީ "އައްޑޫ ލައިވް" އެވެ.