ލ ފޮނަދޫއަށް ރޭ ފަތިހު ނަގޫ ރޯޅިއެއް އަރައި ބޮޑެތި ގެއްލުންތަކެއް ވެއްޖެއެވެ
ފޮނަދޫ ބަރާސިލް އަވަށަށް ރޭ ފަތިހު 4:30 ހާއިރު އެރި ނަގޫރޯޅީގައި އެ ސަރަހައްދުގެ 9 ގެއަކަށް ވަނީ ގެއްލުން ލިބިފައެވެ.
ފުލުހުން ބުނީ ނަގޫރޯޅި އަރައި އެރަށުގެ މީހުން ދިރިއުޅޭ 9 ގެއެއްގެ ފުރާޅު އެއްލާލައި، ފުރާޅު މައްޗަށް ގަސްތައް ވެއްޓި، ބޮޑެތި ގެއްލުންތަކެއް ލިބިފައިވާކަމަށެވެ. އަދި އެރަށު ބަނދަރުގައި އޮތް 2 ލޯންޗަކަށްވެސް އެކި ވަރުގެ ގެއްލުން ތައް ލިބިފައިވާކަމަށް ފުލުހުން ވިދާޅުވިއެވެ. މީގެ އިތުރުން ފަޅުގެއެއްގެ ފާރުވެސް ވެއްޓިފައިވާކަމަށް ފުލުހުން ވަނީ ބުނެފައެވެ.
މިހާދިސާގައި ލިބުނު ގެއްލުމުގެ ތަފްސީލް ފުލުހުންނާއި ކައުންސިލް އަދި ސިފައިން ގުޅިގެން ހޯދަމުން އަންނަކަމަށެވެ. ކައުންސިލުންވެސް ވަނީ މި ހާދިސާގެ ގެއްލުން ބަލަމުން އަންނަ ކަމަށް ބުނެފައެވެ.
ފޮނަދޫ ކައުންސިލްގެ ރައީސް އަޙްމަދު ރިޔާޒު ވިދާޅުވީ، ނަގޫރޯޅި އެރި ވަގުތަކީ ކޮންވެސް ވަރަކަށް ވާރޭ ވެހުނު ވަގުތަށްވުމުން ފުރާޅު އެއްލާލި ގޭތެރޭގައި ހުރި ބައެއް ސާމާން ހަލާލުވެފައިވާ ކަމަށެވެ. އެގޮތުން، ފުރާޅު އެއްލާލި ބައެއް ގޭގޭގެ ފަރުނީޗަރާއި ހިފާގެންގުޅޭ ސާމާނަށް ފެނުގެ އަސަރުކޮށް އެކި ވަރުގެ ގެއްލުންތައް ލިބިފައިވާކަމަށް ރިޔާޒު ވިދާޅުވިއެވެ.