މިހާރު ކުޅުދުއްފުށީގައި ކުރިއަށްދާ 18 ވަނަ އިންޓަރ ސްކޫލް އެތްލެޓިކްސް މުބާރާތުގައި އިއްޔެ އޮތް 200 މީޓަރު ދުވުމުން ޝަރަފުއްދީން ސްކޫލް އެއްވަނަ ހޯދައިފިއެވެ.
އިއްޔެގެ އިވެންޓްގައި ޝަރަފުއްދީންގެ ޝަހުދާން ވަނީ 200 މީޓަރ ދުވުމުން އެއްވަނަ ހޯދާފައެވެ. ދެވަނަ ލިބުނީ ދަރުމަވަންތަ ސްކޫލުގެ ކުއްޖެކެވެ. އަދި ތިން ވަނަ އަށް ދިޔައީ ޝަރފުއްދީން ސްކޫލްގެ އަމީން އެވެ.
މުބާރާތުގެ ދެ ދުވަސް ނިމުނު އިރު 20 ޕޮއިންޓާއި އެކު ޝަރަފުއްދީން ވަނީ 17 އަހަރުން ދަށުގެ ފިރިހެން ކުދިންގެ ބައިން އެއްވަނާގައެވެ.
ޝަރަފުއްދީންގެ ކޯޗު އަހުމަދު އަޒުމީ ވިދާޅުވީ ބާކީ ދެން ހުރި އިވެންޓް ތަކަކީ 4 ގުނަ 100 އަދި 4 ގުނަ 200 ރިލޭ ކަމަށެވެ. އަދި މި ދެ އިވެންޓުން ގޯލްޑް މެޑެލް ލިބިއްޖެ ނަަމަ ޝަރަފުއްދީން އަށް މި އުމުރު ފުރައިން އެއްވަނަ ލިބޭނެ ކަމަށް އަޒުމީ ވިދާޅުވިއެވެ.
އަޒުމީ ވިދާޅުވީ ހުރިހާ އެތްލީޓުން ވެސް ތިބީ އެއްވަނަ ނަގައި ތައްޓާއި އެކު އައްޑޫއަށް އައުމުގެ އަޒުމުގައި ކަމަށެވެ.
އެތްލެޓިކްސް މުބާރާތުގެ އެހެނިހެން ސްކޫލު ތަކަށް ބަލާލާ އިރު ފުރަތަމަ ދެދުވަހުގެ އިވެންޓުތައް ނިމުނުއިރު ޕޮއިންޓް ތާވަލުގެ 11 އަހަރުން ދަށުގެ ފިރިހެން ކުދިންގެ ބައިން 18 ޕޮއިންޓާއެކު 1 ވަނަ އާއި، 13 އަހަރުން ދަށުގެ ފިރިހެން ކުދިންގެ ބައިން 21 ޕޮއިންޓާއެކު 1 ވަނާގައި އޮތީ ހދ. އަތޮޅު ތައުލީމީ މަރުކަޒުއެވެ.
15 އަހަރުން ދަށުގެ ފިރިހެން ކުދިންގެ ބައިން 23 ޕޮއިންޓާއެކު ޖަލާލުއްދީން ސްކޫލް އެއްވަނަ ހޯދާފައިވާއިރު 20 ޕޮއިންޓު ހޯދައިގެން 17 އަހަރުން ދަށުގެ ފިރިހެން ކުދިންގެ ބައިން 1 ވަނަ ހޯދާފައިވަނީ ޝަރަފުއްދީން ސްކޫލެވެ.
މީގެއިތުރުން 11 އަހަރުން ދަށުގެ އަންހެން ކުދިންގެ ބައިން 12 ޕޮއިންޓާއި އެކު އޭއީސ އެއްވަނަ ހޯދާފައިވާއިރު، 13 އަހަރުން ދަށުގެ އަންހެން ކުދިންގެ 1 ވަނަ ތައުލީމީ މަރުކަޒުން ހޯދާފައިވަނީ 36 ޕޮއިންޓާއި އެކުއެވެ. 15 އަހަރުން ދަށުގެ އަންހެން ކުދިންގެ 1 ވަނަ ޖަލާލުއްދީން ސްކޫލް 23 ޕޮއިންޓާއި އެކު ހިމެނޭއިރު 17 އަހަރުން ދަށުގެ އަންހެން ކުދިންގެ 1 ވަނަ ހިރިޔާ ސްކޫލް ހޯދާފައިވަނީ 10 ޕޮއިންޓުން ހާސިލްކޮށްގެންނެވެ.