ހިތަދޫ އަދި ހުޅުމީދޫގައި އިމާރާތްކޮށްފައިވާ ހައުސިން ޔުނިޓުތައް ބައްލަވާލެއްވުމަށް މިނިސްޓަރ އޮފް ހައުސިން އެންޑު އާބަން ޑިވެލޮޕްމަންޓް އާމިނަތު އާތިފާ މިއަދު ހެނދުނު އައްޑޫއަށް ވަޑައިގެންފިއެވެ.
މިނިސްޓަރ އާތިފާ އައްޑޫއަށް ވަޑައިގަތުމުން އައްޑޫ އިންޓަނޭޝަނަލް އެއާޕޯޓުން މަރުހަބާ ދަންނަވާފައިވަނީ އައްޑޫގެ މޭޔަރ އަބްދުﷲ ސޯދިގު (ސޯބެ)އެވެ. މި ދަތުރުފުޅުގައި މިނިސްޓަރ އެންމެ ފުރަތަމަ ވަޑައިގަތުމަށް ހަމަޖެހިފައިވަނީ ހުޅުދޫގައި ހަދާފައިވާ ހައުސިން ޔުނިޓުތައް ބައްލަވާލެއްވުމަށެވެ. އޭގެ ފަހުން ހިތަދޫއަށް ވަޑައިގެން ހިތަދޫ ހައުސިން ޔުނިޓު ބައްލަވާލައްވައި ކައުންސިލާއި ބައްދަލު ކުރުމަށް ވަނީ ހަމަޖެހިފައެވެ.
މީގެ އިތުރުން ފޭދޫގައި އަޅާފައިވާ ރޯހައުސްތައްވެސް ބައްލަވާލެއްވުމަށް ވަނީ ހަމަޖެހިފައެވެ.
ރައީސް ޔާމީންގެ ވެރިކަމުގައި ހިތަދޫ އަދި ހުޅުދޫގައި އިމާރާތް ކުރި ފްލެޓުތައް އެއްވެސް ބަޔަކަށް ނުދީ ބަހައްޓާފައިވަނީ އެ ތަނުގައި ކުރަން ޖެހޭ ބައެއް މަސައްކަތް ނުނިމިވާތީއެވެ. އަދި ފްލެޓުތަކަށް އެދި ހުށަހެޅި ފަރާތްތައް ހާމަ ނުކޮށް ލަސްވާތީ ފްލެޓުތަކަށް އެދުނު ފަރާތްތަކުން ދަނީ ކަންބޮޑުވުން ފާޅު ކުރަމުންނެވެ.
މިނިސްޓަރ އާތިފާ މިއަދު ހުޅުދޫ ފްލެޓުތަކަށް ޒިޔާރަތް ކުރައްވާއިރު އެފްލެޓުތަކަށްވަނީ ވަރަށް ބޮޑެތި ގެއްލުންދީ ހަލާކުކޮށްލާފައެވެ.