ރެޑްބުލްއިން އިންތިޒާމްކޮށްގެން ބާއްވާ ރެޑްބުލް ވިނިން ފައިވް 5 އަ ސައިޑް މުބާރާތުގެ އައްޑޫ ކޮލިފިކޭޝަން މެޗުތައް މިރޭ ފޭދޫ ފުޓްބޯޅަ ދަނޑުގައި ކުޅޭނެއެވެ.
މިރޭ 8 ޖަހާއިރު ފަށާ މި މުބާރާތުގައި މިހާތަނަށް 10 ޓީމަކުންވަނީ ބައިވެރިވެފައެވެ. މުބާރާތުގެ ހުރިހާ މެޗުތަކެއްވެސް މިރޭ ކުޅެ ނިންމާލާ ގޮތަށްވަނީ ހަމަޖެހިފައެވެ.
ރެޑްބުލް ވިނިން ފައިވް އަކީ ފައިވް އޮން ފައިވް ފުޓުބޯޅަ މުބާރާތެކެވެ. މި މުބާރާތުގައި ކޮންމެ ޓީމެއްގައި ވެސް ފަސް ކުޅުންތެރިން ހިމެނުނުއިރު، ގޯލްކީޕަރެއް ނުހުރެއެވެ. މި މުބާރާތުގެ ގަވައިދުގައި އެންމެ ފާހަގަކޮށްލެވޭ ކަމަކީ ޓީމަކުން ލަނޑެއް ޖަހައިފި ނަމަ، އިދިކޮޅު ޓީމުގެ ކުޅުންތެރިއެއް މަދުވުމެވެ. ދިހަ މިނިޓަށް ކުޅޭ މެޗެއްގައި ޓީމެއްގެ ކުޅުންތެރިން ހުސްވެއްޖެ ނަމަ، 10 މިނިޓު ހަމަވުމުގެ ކުރިން ވެސް މެޗު ނިމިދާނެ އެވެ. އަދި ދެ ޓީމު އެއްވަރުވެއްޖެ ނަމަ، މެޗުގެ ނަތީޖާ ކަނޑައަޅާނީ ޕެނަލްޓީ ޖަހައިގެންނެވެ.