މަޝްހޫރު ގާނޫނީ ވަކީލު އަދި ރައީސުލް ޖުމުހޫރިއްޔާ އުފައްދަވާފައިވާ މަރުތަކާ ބެހޭ ޚާއްސަ ކޮޮމިޝަންގެ ރައީސް ހުސްނުއް ސުއޫދު މިއަދު ސުޕްރީމް ކޯޓަށް ހާޒިރުކުރަން އަންގައިފިއެވެ.
ސުއޫދުގެ މައްސަލަ ބަލަން ސުޕްރީމް ކޯޓުން ނިންމީ، ޕީއެސްއެމްގެ ޕްރޮގްރާމެއްގައި ވާހަކަ ދައްކަވަމުން، ރާއްޖޭގެ ސުޕްރީމް ކޯޓުގެ އިސް ފަނޑިޔާރުންގެ މަގާމުގައި ތިއްބެވި 5 ފަނޑިޔާރުން ވެސް ވަކިކުރަން ޖެހޭ ކަމަށް ވިދާޅުވުމާ ގުޅިގެންނެވެ. ސުޕްރީމް ކޯޓުން ބަލަމުންދާ މައްސަލައަކާ ގުޅިގެން ކޯޓަށް ހާޒިރުވުމަށް އަންގައި ފޮނުވި ޗިޓެއް ސުއޫދު ވަނީ އާންމުކޮށްފައެވެ.
އަދި ކޯޓަށް ހާޒިރުވާނެ ކަމަށާއި ޝަރުއީ ދާއިރާ އިސްލާހް ކުރަން ދޭން ޖެހޭ އެއްބާރުލުމެއް ދޭނެ ކަމަށް ސުއޫދު ވިދާޅުވެފައިވެއެވެ.
ސުއޫދުގެ ގާނޫނީ ވަކީލު ކަމުގެ ހުއްދަ ފާއިތުވެދިޔަ ދެ އަހަރު ތެރޭ އެކި ފަހަރު މަތިން ވަނީ ބާތިލުކޮށްފައެވެ. ސުޕްރީމް ކޯޓު ކުރިމަތީ ގިނަ އަދަދެއްގެ ވަކީލުން އެއް ފަހަރާ މުޒާހަރާ ކުރުމުން، އެ ހުރިހާ ވަކީލުންގެ ވަކީލުކަމުގެ ހުއްދަ ވަނީ ހިފަހައްޓާފައެވެ. އޭގެ ތެރެއިން ގިނަ ވަކީލުންގެ ހުއްދަ، ފަހުން މައާފަށް އެދުމުން ވަނީ ދީފައެވެ.
ނަމަވެސް ސުއޫދުގެ ހުއްދަ އަލުން ލިބިފައިވަނީ 1 ފެބްރުއަރީގައި ސުޕްރީމް ކޯޓުން އިއްވި ހުކުމަށް ފަހުގައެވެ.