މުޅި ރާއްޖެ އަށް ހުޅުވާލައިގެން އައްޑޫގައި ކޮންމެ ރޯދަ މަހަކު ކުރިއަށް ގެންދާ ފޯރިގަދަ ފުޓްސަލް މުބާރާތް "ގޯދިއްޔާ ފުޓްސަލް ޗެލެންޖް" ގައި ބައިވެރިވާ 20 ޓީމް ކަނޑައަޅާފައިވާ ކަމަށް އެ ޖަމިއްޔާއިން ބުނެފި އެވެ.
ގޯދިއްޔާގެ އޮފިޝަލަކު ވިދާޅުވީ މުބާރާތުގައި ބައިވެރިވުމުގެ ފުރުސަތު މިދިޔަ މަހުގެ 25 ވަނަ ދުވަހު ހަމަވެފައިވާއިރު ގިނަ އަދަދެއްގެ ޓީމް ތަކުން މުބާރާތުގައި ބައިވެރިވުމަށް ހުށަހެޅި ކަމަށެވެ.
ނަމަވެސް ގޯދިއްޔާއިން މުބާރާތަށް ޓީމް ކަނޑަ އަޅަނީ ކުރީ އަހަރުގެ މުބާރާތުގައި ބައިވެރިވެފައިވާ ޓީމް ތައް ސީޑް ކުރުމަށްފަހު ބާކީ ހުރި ޖާގަ ތަކަށް އާ ޓީމް ތަކަށް ފުރުސަތު ދޭ ގޮތަށެވެ.
އޮފިޝަލް ވިދާޅުވީ ބައިވެރިވުމުގެ ފުރުސަތު ދިން ޓީމް ތަކަށް ޓީމް ލިސްޓް ހަވާލު ކުރުމަށް މި މަހުގެ 25 ވަނަ ދުވަހާއި ހަމައަށް ހުޅުވާލާފައިވާ ކަމަށެވެ.
ގޯދިއްޔާއިން ބުނީ މި ފަހަރު ފުރުސަތު ދިން ޓީމް ތަކަކީ ފޭދޫ ހަބޭސް، ފޭދޫ ޔޫތުކޮމިއުނިޓީ، މަރަދޫ ޒިލޯން، މާކަރީ ޔުނައިޓެޑް، ރެސްކިއު، ޝަންގްރިއްލާ ޔުނައިޓެޑް، ރިއަލް މަރަދޫ، އޯޕީއެޗް ސްޕޯޓްސް، މަލްޓީ ޖީނިއަސް، އެފްސީ ރެސްޕެކްޓް، ޒިލޮޓް، ކެންޑާ އެފްސީ، އަބާނީ، ޔަންގް ވަންސް، އެފް އާރްޓީ، އެފްސީ ޒެފިއާ، ކްލަބް މަރަދޫ، ޔުނިއަން ސްޕޯޓްސް ކްލަބް، ޓީއެފްޓީ ވޮރިއާސް، އަދި ފްރަންޑްސް ކްލަބެވެ.
އޮފިޝަލް ވިދާޅުވީ މި އަހަރުގެ މުބާރާތުގައި މުޅިން އާ ޓީމް ތައް ފެނިގެންދާނެ ކަމަށެވެ.
ގޯދިއްޔާއިން ބުނީ މުބާރާތަށް ސްޕޮންސާ ހޯދުމުގެ މަސައްކަތް އެ ޖަމިއްޔާއިން ކުރަމުން އަންނަ އިރު މިއަހަރުގެ މުބާރާތުގެވެސް މެއިން ސްޕޮންސާ އަކީ އެސްޓީއޯގެ ކުރުގާ ކޮފީ ކަމަށެވެ. އަދި ކޯ ސްޕޮންސަރުންގެ ގޮތުގައި އަލޯރާ އާއި އެނާޖީ ޑްރިންކްގެ ގޮތުގައި ޕަވާ ހޯން ހަމަޖެހިފައިވާ ކަމަށް އޮފިޝަލް ވިދާޅުވި އެވެ.
މިއަހަރުގެ މުބާރާތަށް ގޯދިއްޔާއިން ހުށަހަޅާފައިވަނީ ޗެމްޕިއަން ޓީމަށް 50،000ރ. އެވެ. މިދިޔަ އަހަރުގެ މުބާރާތުގެ ޗެމްޕިއަން ޓީމަށް ދީފައިވަނީ 35،000 ރުފިޔާ އެވެ.