އިސްލާމިކް ސްޓޭޓްގެ ނަމުގައި ހަރަކާތްތެރިވާ ހަނގުރާމަވެރި ޖަމާއަތުގެ ލީޑަރު، އަބޫބަކު އަލް-ބަޣްދާދީ، ބަދަލު ހިފާނެ ކަމަށް ބުނެ ވީޑިއޯ މެސެޖެއް ފޮނުވައިފިއެވެ.
މިއީ ފަސް އަހަރު ތެރޭގައި ބަޣްދާދީގެ ފުރަތަމަ ފެނިލުމެވެ. މުޅި ދުނިޔެވެސް ގަބޫލުކޮށްގެން ތިބީ އިއްޔެ އޭނާގެ ވީޑިއޯ މެސެޖު ފޮނުވުމުގެ ކުރިން، އޭނާ ވަނީ މަރުވެފައި ކަމަށެވެ. މީގެ ފަސް އަހަރު ކުރިން، ބަޣްދާދީ މަރާލެވިފައިވާ ކަމަށް ވެސް ވަނީ މީޑިޔާގައި އަޑު ފެތުރިފައެވެ.
ބަޣްދާދީގެ ވީޑިއޯ މެސެޖުގައި އޭނާ ވަނީ އައިއެސްގެ ބާރު ކެނޑި ގެއްލިފައިވާ ބިންތައް އަލުން އަތުލައި، ބަދަލު ހިފާނެ ކަމަށެވެ.
އިއްޔެ އައިއެސްގެ ނެޓްވޯކަކުން މިވީޑިއޯ އާންމުކޮށްފައިވާއިރު އެ ޖަމާއަތުން ބުނެފައިވަނީ މިވީޑިއޯ އަކީ މިމަހު ނެގުނު ވީޑިއޯ އެއް ކަމަށެވެ.
ނަމަވެސް އެމެރިކާ އިދާރާތަކުން އަދި ވީޑިއޯގެ ސައްހަ ކަމާއި، ވީޑިއޯއަކީ ކޮން ދުވަހެއްގައި ނެގުނު ވީޑިއޯއެއްކަން ހާމަކޮށްފައެއް ނުވެއެވެ.
މިދިޔަ ހަފްތާގެ އާދީއްތަ ދުވަހު ސްރީ ލަންކާގެ ކްރިސްޓިއަން ޗާޗްތަކާއި ހޮޓެލް ތަކުގައި ވަނީ ބޮން ގޮއްވައި ގިނަ ބަޔަކު މަރާލާފައެވެ. މި ޓެރަރިސްޓު ހަމަލާއަކީ ނިއުޒީލެންޑުގެ މިސްކިތަކަށް ދިން ހަމަލާގެ ބަދަލު ހިފުމެއް ކަމަށް ބުނެ އައިއެސް އިން ވަނީ ހަމަލާތަކުގެ ޒިންމާ ނަގާފައެވެ.