ދިވެހި ފުލުހުންގެ ޚިދުމަތް މާލެއެކޭ އެއްފަދައިން އަތޮޅު ތެރޭގައި ވެސް ފުޅާކޮށް ހަރުދަނާ ކުރެވޭނެ ކަމަށާއި އެ މަސައްކަތް ކުރަމުން އަންނަ ކަމަށް ކޮމިޝަނަރ އޮފް ޕޮލިސް، މުހައްމަދު ހަމީދު ވިދާޅުވެއްޖެއެވެ.
ރޭ ގދ. ތިނަދޫގައި، ފުލުހުން 86 ވަނަ އަހަރީ ދުވަސް ފާހަގަކުރުމުގެ ގޮތުން ބޭއްވުނު ޚާއްސަ ހަފުލާގައި ވާހަކަ ދައްކަވަމުން ސީޕީ ވިދާޅުވީ، ކުރިއަށް އޮތް ފަސް އަހަރަށް ފުލުހުންގެ ޚިދުމަތް ހަރުދަނާ ކުރުމަށް ކަނޑައެޅިފައިވާ ސްޓެޓީޖިކް ޕްލޭނުގައި ތަފާތު 8 ދާއިރާއަކަށް އިސްކަން ދެވޭނެ ކަމަށެވެ.
އޭގެ ތެރޭގައި، އަތޮޅުތަކުގައި ދެވޭ ފުލުހުންގެ ޚިދުމަތްތައް ހަރުދަނާކޮށް އިތުރަށް ތަރައްގީކުރުމަށްޓަކައި ޚާއްސަ މަސައްކަތްތަކެއް ރިއަށް އޮތް މަސްތަކުގައި އަދި އަހަރުތަކުގެ ތެރޭގައި ކުރެވޭނެ ކަމަށް ސީޕީ ވިދާޅުވިއެވެ. އަދި ޑިވިޝަނަލް ޕޮލިސިން ކޮމާންޑުގެ ހިމެނޭ ޑިވިޝަންތަކާއި ޕޮލިސް ސްޓޭޝަންތައް ބައްޓަން ކުރުމަށް ބިނާ ކުރުން އަދި ތަރައްގީ ކުރުން ވަރަށް ބޮޑުތަނުން ފުޅާ ކުރެވިގެންދާނެ ކަމަށް ވިދާޅުވިއެވެ.
ރައީސް ސޯލިހްގެ ވެރިކަމުގައި ފުލުސް އިދާރާ ހަރުދަނާ ކުރުމަށް ގިނަ ކަންތައްތަކެއް ވަނީ ފާހަގަކޮށްފައެވެ. ފުލުހުންނާ ރައްޔިތުންނާ އޮންނަ ގުޅުން ވަރުގަދަ ކުރުމަށް ޚާއްސަ އިސްކަމެއް ދެވޭނެ ކަމަށް ހޯމް މިނިސްޓަރ ޝެއިޚް އިމްރާން ވެސް ވަނީ އެކި ފަހަރު މަތިން ވިދާޅުވެފައެވެ.