ރޯދަމަސް ފެށުމުގެ ކުރިން ސައުދީ އަރަބިއްޔާއިން ރާއްޖެއަށް ހަދިޔާކުރި ކަދުރު ބަހާނެ ކަމަށް އިސްލާމިކް މިނިސްޓަރ ޑރ. އަހުމަދު ޒާހިރު ވިދާޅުވެއްޖެއެވެ.
ކޮންމެ އަހަރަކުވެސް ސައުދީ ރަސްގެފާނު ސަލްމާން އަބްދުލްއަޒީޒް ރާއްޖޭގެ ރައްޔިތުންނަށް ހަދިޔާ ކުރައްވާ 50 ޓަނުގެ ކަދުރު މިފަހަރުވެސް ވަނީ ރާއްޖެ ފޮނުވާފައެވެ. ކަދުރާ ހަވާލުވެވަޑައިގެންފައިވަނީ ދިވެހި ސަރުކާރުގެ ފަރާތުން މިނިސްޓަރ ޒާހިރެވެ.
ސައުދީ އެމްބަސީގައި މިއަދު ހެނދުނު އޮތް މި ރަސްމިއްޔާތަށް ފަހު މިނިސްޓަރ ވިދާޅުވީ ރޯދަމަސް ފެށުމުގެ ކުރިން ދިވެހި ރައްޔިތުންނަށް ކަދުރު ބެހުމުގެ މަސައްކަތް ފައްޓަވާނެ ކަމަށެވެ. ނަމަވެސް ރާއްޖޭގައި ދިރިއުޅޭ ހުރިހާ ރައްޔިތުންނަށް ކަދުރު ބެހޭ ވަރު ނުވާނެ ކަމަށެވެ.
ފަންސާސް ޓަނު ކަދުރަކީ ރާއްޖޭގެ ހުރިހާ ރައްޔިތުންނަށް ފުދޭނެ މިންވަރެއް ނޫން ކަމަށް އެމަނިކުފާނު ވިދާޅުވިއެވެ. ކޮންމެ އަހަރަކު ރޯދަ މަހާ ދިމާކޮށް ސައުދީގެ އިތުރު ރާއްޖޭގެ ވިޔަފާރިވެރިންވެސް ރައްޔިތުންނަށް ކަދުރު ބަހައެވެ.
މިއަހަރުގެ ރަމަޟާން މަހުގެ ހަނދު ސާބިތުކުރުމުގެ ޖަލްސާ އޮންނާނީ އަންނަ ހޮނިހިރު ދުވަހުގައެވެ.