ލަންކާގައި މިދިޔަ ހަފްތާގައި ދިން ޓެރަރިސްޓު ހަމަލާތަކާ ގުޅިގެން އެ ގައުމުގައި، އިސްލާމް ދީނުގެ މައުލޫމާތާއި ވައުޟު ނަސޭހަތް ދައްކާ ޕީސް ޓީވީ ނުފެންނަ ގޮތަށް ހަދައިފިއެވެ.
ދީނީ އިލްމުވެރިޔާ ޑރ. ޒާކިރް ނައިކް ހިންގާ ޕީސް ޓީވީ ލަންކާއިން ބްލޮކް ކޮށްފައިވާއިރު މީގެ ކުރިން ވަރަށް ގިނަ ގައުމުތަކުން ވެސް ވަނީ ޕީސް ޓީވީ، ޑރ. ޒާކިރް ނައިކްއަށް އަމާޒުވި ކޮރަޕްޝަނާއި ޓެރަރިސްޓު ޖަމާއަތްތަކަށް ޚަރަދުކުރާކަމުގެ ތުހުމަތުތަކާއެކު ބްލޮކް ކޮށްފައެވެ.
ލަންކާގައި ޕީސް ޓީވީ ދެއްކުން ކޭބަލް އޮޕަރޭޓަރުން ހުއްޓާލާފައިވި ނަމަވެސް މިއީ ސީދާ ސަރުކާރުން އަންގައިގެން ކުރި ކަމެއް ކަން ސާފުވެފައެއް ނުވެއެވެ. ލަންކާ ސަރުކާރުން ރަސްމީ ގޮތެއްގައި ޕީސް ޓީވީ ހުއްޓާލަން އަންގާފައެއް ނުވެއެވެ.
ހަމަލާތަކާ ގުޅިގެން ލަންކާގެ މުސްލިމުން ބިރުވެރިކަމެއްގެ ތެރޭގައި އުޅެމުންދާކަން ފާހަގަކޮށްލެވޭއިރު ލަންކާ ސަރުކާރުން ވަނީ އަންހެނުން މޫނު ބުރުގާ އެޅުން މަނާކޮށް، ބުރުގާ އަޅާއިރު ކަންފަތް ވެސް ނުފޮރުވޭ ގޮތަށް ހަދާފައެވެ.