މިއަހަރުގެ ފުރަތަމަ ތިން މަސް ނިމުނުއިރު ވަޒީފާތައް އިތުރުވެގެން ގޮސްފައިވާ ކަމަށް މޯލްޑިވްސް މަނިޓަރީ އޮތޯރިޓީ(އެމްއެމްއޭ) އިން ހާމަކޮށްފިއެވެ.
އެމްއެމްއޭ އިން ތައްޔާރުކުރި ބިޒްނަސް ސާވޭ ރިޕޯޓުގައި ބަޔާންކޮށްފައިވާ ގޮތުގައި ފުރަތަމަ ކުއާޓާގައި ރާއްޖޭގައި މައި ހަތަރު ސިނާއަތުގައި ވަޒީފާ ދިން މިންވަރު، މިދިޔަ އަހަރުގެ ފަހު ކުއާޓާއާ އަޅާ ބަލާއިރު އިތުރުވެފައިވާ ކަމަށެވެ.
އެމްއެމްއޭ އިން މި ރިޕޯޓު ބިނާކޮށްފައިވަނީ ފަތުރުވެރިކަމުގެ ސިނާއަތް، އިމާރާތްކުރުމުގެ ދާއިރާ، އަދި އުފެއްދުންތެރިކަމުގެ ދާއިރާ އާއި ހޯލްސޭލް، ރީޓެއިލް ވިޔަފާރި ކުރާ ވިޔަފާރިތަކުން ހޯދި މައުލޫމާތްތަކަށެވެ.
އެގޮތުން ފަތުރުވެރިކަމުގެ ދާއިރާގައި 58 ވިޔަފާރިއަކުން ބުނެފައިވަނީ ވަޒީފާތައް އިތުރުވެފައިވާ ކަމަށާއި އަދި ދެވަނަ ކުއާޓާގައި ވަޒީފާތައް މިހާރަށްވުރެ ބޮޑަށް އިތުރުވާނެ ކަމަށެވެ. އިމާރާތްކުރުމުގެ ދާއިރާގައި ހަރަކާތްތެރިވާ ވިޔަފާރިތަކުގެ ތެރެއިން 35 ވިޔަފާރިއެއް ވަޒީފާ އިތުރުވި ކަމަށް މައުލޫމާތު ދީފައިވާއިރު ނުވާ ކަމަށް ބުނެފައިވަނީ 31 ވިޔަފާރިއެކެވެ. ވަޒީފާ މަދުވި ކަމަށް 34 ވިޔަފާރިއަކުން ވަނީ މައުލޫމާތު ދީފައެވެ.
އުފެއްދުންތެރިކަމުގެ ވިޔަފާރިތަކަށް ބަލާއިރު ވަޒީފާ އިތުރުވި ކަމަށް ބުނީ 19 ވިޔަފާރިއެކެވެ. 79 ވިޔަފާރިއަކުން ބުނީ ވަޒީފާގެ ނިސްބަތަށް ބަދަލެއް އައިސްފައިނުވާ ކަމަށެވެ. ރީޓެއިލް ހޯލްސޭލް ވިޔަފާރިތަކުގެ ތެރެއިން 27 ކުންފުންޏަކުން ވަނީ ވަޒީފާ އިތުރުކޮށްފައެވެ.