އަންނަ ރޯދަ މަހާ ދިމާކޮށް އައްޑޫގައި ވިޔަފާރި ފެއާއެއް ބޭއްވުމަށް ތައްޔާރު ވަމުން އަންނަ ކަމަށް މަރަދޫ ހިޔައު ޖަމިއްޔާ އިން ބުނެފި އެވެ.
މި މަހުގެ 29 ވަނަދުވަހުން ފެށިގެން ޖުލައި 3 ވަނަ ދުވަހާއި ހަމައަށް ބާއްވާ މި ފެއާގައި ސްޓޯލްތައް ވިއްކުމަށް ހަމަޖެހިފައި ވަނީ 1.000ރ. އަށެވެ.
ހިޔައު ޖަމިއްޔާގެ އޮފިޝަލަކު ވިދާޅުވީ އެ ޖަމިއްޔާއިން ކުރިއަށް ގެންދަން ނިންމާފައިވާ ފެއާއަށް ވިޔަފާރުވެރިންގެ ބޮޑު ތަރުހީބެއް ލިބެމުން އަންނަ ކަމަށެވެ.
"އަޅުގަނޑުމެން މި ފެެއާ މި ބާއްވަނީ ޖޫން 29 ން ޖުލައި 3 ވަނަ ދުވަހާއި ހަމައަށް، ސްޓޯލްއެއް ފަސް ދުވަހަށް މި ދެނީ 1000 ރުފިޔާއަށް. ވިޔަފާރި ވެރިންގެ ބޮޑު ތަރުހީބެއް އެބަލިބޭ." އޮފިޝަލް ވިދާޅުވި އެވެ.
އޮފިޝަލް ވިދާޅުވީ ރޯދަ މަހާއި ދިމާކޮށް އެއްޗެހި ގަންނަން އަދި ވިއްކަން ބޭނުންވާ ފަރާތަކަށް އެއްތަނަކުން ގިނަ އެއްޗެހިތައް ލިބޭނެ ފުރުސަތު މި ފެއާއިން ހުޅުވިގެން ދާނެ ކަމަށެވެ.
އަދި މިހާރު ވެސް ސްޓޯލްތައް ބޭނުން ބޭފުޅުންނަށް ލިބެން ހަމަޖެހިފައިވާ ކަމަށެވެ. އެގޮތުން 7955243 ނަންބަރު ފޯނަށް ގުޅައިގެން ސްޓޯލް ބުކް ކުރުމުގެ އިންތިޒާމް ހަމަޖެހިފައިވާ ކަމަށެވެ.
ހިޔައު ޖަމިއްޔާއިން ބުނީ މި ފެއާ ބާއްވަން ހަމަޖައްސާފައި ވަނީ މަރަދޫފޭދޫގައި ހުންނަ ޒުވާނުންގެ މަރުކަޒުގައި ކަމަށެވެ. އަދި ފެއާ ހުޅުވިފައި ހުންނާނީ ކޮންމެ ދުވަހަކު ހަވީރު 4 ން ރޭގަނޑު 11 އަށެވެ.