މިދިޔަ މަހު ސްރީ ލަންކާގައި ދިން ޓެރަރިސްޓު ހަމަލާތަކާ ގުޅިގެން، ދިވެހި އިމިގްރޭޝަނުން ރާއްޖޭގެ ބޯޑަރ ސެކިއުރިޓީ ވަރުގަދަކޮށްފިއެވެ.
އިމިގްރޭޝަނުން އިއްޔެ ނެރުނު ބަޔާނެއްގައި ބުނެފައިވަނީ، އަލަށް ގެނައި ބަދަލުތަކަކީ ނުރައްކަލެއް ކުރިމަތިވެދާނެތީ އަޅާފައިވާ ފިޔަވަޅުތައް ކަމަށެވެ. އޭގެ ތެރޭގައި ސްޕެޝަލް އަދި ބިޒްނަސް ވިސާ ދޫކުރުމުގައި އޮންނަ އުސޫލަށް ބަދަލު ގެނެސް މިހާރު އޮންނަ ލުއިތައް ކަނޑާލާފައިވެއެވެ.
މީގެ ކުރިން 48 ގަޑިއިރު ތެރޭ ވިސާ ހަމަޖެހޭ އިރު މިހާރު ވިސާ އެޕްރޫވް ވުން އެއަށްވުރެ ދިގު ލައިގެން ދާނެ ކަމަށް އިމިގްރޭޝަނުން ބުނެއެވެ. ވިސާ އެޕްރޫވް ކުރުމުގެ ކުރިން ވަރަށް ގިނަ ކަންތައްތަކެއް ބެލުމަށް ނިންމާފައިވާއިރު ވިސާ އެޕްރޫވް ނުވަނީސް ރާއްޖެ އެތެރެ ނުވެވޭނެ ކަމަށް ވެސް އިމިގްރޭޝަނުން ބުނެފައިވެއެވެ.
އެހެންކަމުން ވިސާ އެޕްރޫވް ނުވަނީސް ރާއްޖެ ނައުމަށް އިމިގްރޭޝަނުން ވަނީ ކަމާ ބެހޭ ފަރާތްތަކަށް އިލްތިމާސްކޮށްފައެވެ.
އިއްޔެ މިފަދަ ހާދިސާއެއް ދިމާވެ، އިމިގްރޭޝަނުން ވަނީ ޖޯޑަން އިން ރާއްޖެ އައި ފަތުރުވެރިޔަކު ހިފަހައްޓާފައެވެ. އޭނާ ވަނީ އެކަމާ ގުޅިގެން އިމިގްރޭޝަނަށް ފާޑުކިޔައި އިންޒާރު ދީފައެވެ. އިމިގްރޭޝަނުން ބުނެފައިވަނީ މިހާރު އޭނާ އަނބުރާ ފޮނުވާލަން ތައްޔާރު ވަމުން އަންނަ ކަމަށެވެ.