އިންޑިޔާ އިންތިޚާބު ފެށިގެން ކުރިއަށްދާއިރު ވާދަވެރި ދެ ޕާޓީ، ކޮންގްރެސް ޕާޓީއާއި ވެރިކަން ކުރާ ބީޖޭޕީގެ ބަހުގެ ކޯޅުންތައް އިންތިހާއަށް ގޮސްފިއެވެ. ބޮޑުވަޒީރު ނަރެންދްރަ މޯދީ ވަނީ އިދިކޮޅު ޕާޓީގެ ލީޑަރ ރަހުލް ގާންދީއަށް ފާޑުވިދާޅުވަމުން، އޭނާގެ ބައްޕާފުޅު، އިންޑިޔާގެ ކުރީގެ ބޮޑުވަޒީރު ރަޖިވް ގާންދީއަކީ ޚިޔާނާތްތެރިންގެ "ނަމްބަރު 1" ކަމަށް ވިދާޅުވެފައެވެ.
އުއްތަރު ޕްރަދޭޝްގައި ބޭއްވި ރެލީއެއްގައި ވާހަކަ ދައްކަވަމުން މޯދީ ވިދާޅުވީ ރަޖިވް ގާންދީއަކީ ބަތަލެއް ކަމަށް ބައެއް މީހުން ސިފަކުރި ނަމަވެސް ރަޖިވް ގާންދީ އަވަހާރަވިއިރު ލިބިވަޑައިގެންފައި އޮންނެވި ލަގަބަކީ "ކޮރަޕްޓް ނަމްބަރު 1" ކަމަށެވެ.
ކޮންގްރެސް ޕާޓީގެ ބާރު އިންޑިޔާއިން ކެނޑިގެންދިޔަ "ބޮފޯސް" މައްސަލައަށް އަލިއަޅުވާލަމުން މޯދީ ވަނީ އިދިކޮޅު ކޯލިޝަނުން މަސައްކަތް ކުރަމުން އަންނަނީ އިންޑިޔާ އަނެއްކާވެސް އަނދަވަޅަކަށް ވައްޓާލުމަށް ކަމަށެވެ. 1986 ވަނަ އަހަރު ކޮންގްރެސް އިން އިންޑިޔާގައި ވެރިކަން ކުރަމުން އައިއިރު ހަތިޔާރު ގަނެފައިވަނީ ވެރިކަމުގައި ތިއްބެވި ބޭފުޅުންނަށް މަންފާ ވާގޮތަށް ކަމަށް އޮޑިޓް ރިޕޯޓުން އެނގިފައިވެއެވެ.
ދެވަނަ ދައުރަކަށް އިންތިޚާބުވުމަށް މަސައްކަތް ކުރަމުން އަންނަ ބޮޑުވަޒީރު މޯދީގެ ޕާޓީން އަންނަނީ އިދިކޮޅު ކޮންގްރެސް ޕާޓީގެ ސިޔާސަތުތަކާއި ލީޑަޝިޕްގެ ގާބިލްކަމާމެދު ސުވާލު އުފައްދަމުންނެވެ.