ހުޅުމާލޭގައި ބަހެއް ކޮންޓްރޯލް ނުވެ ފަތުރުވެރިޔެއްގެ ގައިގައި ޖެހި، އޭނާ މަރުވި ހިތާމަވެރި ހާދިސާ ހިނގާފައިވަނީ ބަސް ޑްރައިވަރު ނިދިފައި ހުއްޓާ ގޮވާލުމުން ސިއްސައިގެން ގޮސް ރޭހަށް ލެވިގެން ކަމަށް މައުލޫމާތު ލިބިއްޖެއެވެ.
އެކްސިޑެންޓު ހިނގިއިރުވެސް މަންޒަރު ދުށް ފަރާތްތަކުން ވަނީ ބަސް ޑްރައިވަރު ހުރީ ނިދިފައި ކަމަށް މައުލޫމާތު ދީފައެވެ. ބަސް އެކްސިޑެންޓުވިއިރު މީހުންވެސް ދަތުރުކުރަމުން ދިޔައިރު އެކްސިޑެންޓު ފެނުނު ބައެއް ފަރާތްތަކާ ހަވާލާދީ "މިހާރު" ނޫހުން ރިޕޯޓުކޮށްފައިވާ ގޮތުގައި ޑްރައިވަރު ނިދިފައި ހުރިތަން ފެނުމުން އެހީތެރިޔާ އޭނާގެ ގައިގައި އަތް ޖައްސާލީ ހޭލެއްވުމަށެވެ.
ނަމަވެސް ކަންދިމާކުރި ގޮތުން ހޭލެވުނު ވަގުތު ޑްރައިވަރު ސިއްސައިގެން ގޮސް، ރޭހަށް ލެވި ބަސް ކޮންޓްރޯލުން ނެއްޓިއެވެ. ކޮންޓްރޯލުން ނައްޓައިގެން މަގުން ހިނގާފައިދިޔަ ދެމީހުންނާ ދިމާލަށް ބާރު ސްޕީޑެއްގައި ދާން ފެށުމުން ދެމީހުން ވެސް ދުއްވައިގަތީ ސަލާމަތް ވުމަށެވެ.
އޭގެ ތެރޭގައި މަރުވި ޔުކްރެއިންގެ ފަތުރުވެރިޔާގެ އިތުރުން ދެން ހުރީ ދިވެހި އަންހެނެކެވެ. ދިވެހި އަންހެން މީހާ ސަލާމަތްވިއިރު ޔުކްރޭން ފަތުރުވެރިޔާ ދުއްވައިގަތް ވަގުތު ފައި ތާށިވެ ދުވާރު މައްޗަށް ވެއްޓިފައިވަނިކޮށް ބަސް ވަނީ އަންހެން މީހާގެ ގައިމަތިން ދުވެފައެވެ.
މި އެކްސިޑެންޓުގައި އަންހެން މީހާގެ ހަށިގަނޑުގެ ބޮޑުބައި ޗިސްވެފައިވާއިރު އެތަނަށް ފަތުރުވެރިޔާ ވަނީ މަރުވެފައެވެ. ޗުއްޓީއަށް ރާއްޖެއައި ޔުކްރެއިންގެ ފަތުރުވެރިޔާ އައިސްފައިވަނީ އޭނާގެ ލޯބިވެރިޔާއާ އެއްކޮށެވެ.
ފުލުހުން ވަނީ ބަސް ޑްރައިވަރު މިހާރު ހައްޔަރުކޮށްފައެވެ. ނަމަވެސް އޭނާއަކީ ބަސް ދުއްވުމުގެ ލައިސަންސް އޮތް، ތިން އަހަރު ވަންދެން ބަސް ދުއްވުމުގައި ހޭދަކޮށްފައިވާ މީހެއް ކަމަށް މައުލޫމާތު ލިބިފައިވެއެވެ.