މިދިޔަ އެޕްރީލް މަހުގެ 21 ވަނަ ދުވަހު ލަންކާއަށް ދިން ބޮމުގެ ހަމަލާއާއި ގުޅިގެން ލަންކާގެ ވިސާގެ އުސޫލު ހަރުކަށިކޮށްފިއެވެ.
ލަންކާ ސަރުކާރުން މި ބަދަލު ގެނެސްފައިވަނީ ބޮމުގެ ހަމަލާއަށް ފަހު އެގައުމުގެ ސެކިއުރިޓީ ވަގުގަދަ ކުރުމުގެ ގޮތުން އެޅި ފިޔަވަޅެއްގެ ގޮތުގައެވެ.
ފޮރިން މިނިސްޓްރީން ބުނީ ކިޔެވުމަށާއި އެހެނިހެން ބޭނުންތަކުގައި ލަންކާގައި ތިބެންޖެހޭ ދިވެހިންނަށް ވިސާ ދޫކުރާނީ ރާއްޖޭގައި ހުންނަ ލަންކާ އެމްބަސީން ކަމަށެވެ.
ފޮރިން މިނިސްޓްރީން ބުނީ މިމަހުގެ 15 ވަނަ ދުވަހު މިއުސޫލަށް އަމަލު ކުރަން ލަންކާއިން ފަށާއިރު އެގައުމަށްދާ ދިވެހިންނަށް ލުއު ފަސޭހަތަކެއް މި ގަވާއިދިގެ ދަށުން ހޯދުމަށް ފޮރިން މިނިސްޓްރީން މަސައްކަތް ކުރަމުން އަންނަ ކަމަށެވެ.
ބޮމުގެ ހަމަލާއަށް ފަހު ލަންކާ ފުލުހުން ދަނީ އެގައުމުގެ ބައެއް ގެތައް ބަލައި ފާސް ކުރަމުންނެވެ. އެގޮތުން ބައެއް ދިވެހިން ދިރިއުޅެމުން ދިޔަ ގެތައްވެސް ފުލުހުން ވަނީ ޗެކްކޮށްފައެވެ. އެގޮތުން ޗެކް ކުރި އިރު ލަންކާގެ ގާނޫނުތަކާއި ހިލާފަށް ތިބި ބައެއް ބޭރުގައުމު ތަކުގެ މީހުން ޑީޕޯޓު ކުރުމަށް ލަންކާ ސަރުކާރުން ވަނީ ނިންމާފައެވެ.