އަލަށް އުފެދުނު އިދިކޮޅު ސިޔާސީ ޕާޓީ، ޕީޕަލްސް ނޭޝަނަލް ކޮންގްރެސް(ޕީއެންސީ) ގެ މަސައްކަތްތައް ރޯދަ މަސް ނިމުމުން ފަށާނެ ކަމަށް އެޕާޓީން ބުނެފިއެވެ.
ޕީއެންސީގެ ތަރުޖަމާނު، ހީނާ ވަލީދު، ސީއެންއެމްއަށް ވިދާޅުވީ ރޯދަމަސް ނިމުމުން ޕާޓީއަށް މެމްބަރުން އިތުރުކުރުމުގެ މަސައްކަތް ފަށާނެ ކަމަށެވެ. މިމަސައްކަތުގައި ޕާޓީގެ ލީޑަޝިޕުން އަމަލީގޮތުން ބައިވެރިވެވަޑައިގަންނަވާނެ ކަމަށާއި ރަށްތަކަށް ދަތުރުކުރަން ވެސް ހަމަޖެހިފައިވާ ކަމަށެވެ.
ނަމަވެސް ޕާޓީގެ ހަތަރު ނައިބު ލީޑަރުން މަސައްކަތް ކުރާނީ ވަކިވަކިން ކަމަށާއި މިހާރުވެސް މަސައްކަތްތަކުގެ މަޝްވަރާތައް ރޭވި ކުރިއަށްދާ ކަމަށް ހީނާ ވިދާޅުވިއެވެ.
ޕީއެންސީގެ ކޮންގްރެސް ބޭއްވުނީ ނިމިގެންދިޔަ އެޕްރީލް މަހުގެ 26 ވަނަ ދުވަހުގައެވެ. ކުރީގެ ރައީސް އަބްދުﷲ ޔާމީން ބައިވެރިވެވަޑައިގެންފައެއް ނުވެއެވެ. ޕީއެންސީގެ ލީޑަރަކީ ޕީޕީއެމްގެ ކުރީގެ ނައިބު ރައީސް އަބްދުއްރަހީމް އަބްދުﷲ އެވެ. ނައިބުންނަކީ ޕީޕީއެމް ޕީޖީ ލީޑަރ އަހުމަދު ނިހާނާއި، މުހައްމަދު ހުސެއިން ޝަރީފް (މުންދު) އާއި ބާރަށު ދާއިރާގެ ކުރީގެ މެމްބަރު ޝުޖާއުގެ އިތުރުން ކުރީގެ އިކޮނޮމިކް މިނިސްޓަރު އަދި މާވަށު ދާއިރާއަށް އިންތިޚާބުވި މުހައްމަދު ސައީދެވެ.