ދައުލަތުގެ މިލްކިއްޔާތުން އިދިކޮޅު ސިޔާސީ ޕާޓީތަކަށް ޚަރަދު ކުރަނީ ނިދާފައި ތިބުމަށް ނޫން ކަމަށާއި ހަވާލުވެފައި އޮތް ޒިންމާ އަދާކުރުމަށް ހިތަދޫ ދެކުނު ދާއިރާގެ ކުރީގެ މެމްބަރު އަލީ ނިޒާރު ގޮވާލައިފިއެވެ.
ނިޒާރު ރޭ ކުރެއްވި ޓުވީޓެއްގައި ވިދާޅުވީ ދައުލަތުން ޕާޓީތަކަށް ޚަރަދު ކުރަނީ ޒިންމާދާރު މަސައްކަތް ކުރުމަށް ކަމަށެވެ. ނިދިން ހޭލާ، އިދިކޮޅު ޕާޓީގެ ޒިންމާ، ޕީޕީއެމުން އަދާކުރަން ޖެހޭ ކަމަށް ނިޒާރު ވިދާޅުވިއެވެ.
މިދިޔަ އަހަރު ސެޕްޓެމްބަރު މަހު ބޭއްވި ރިޔާސީ އިންތިޚާބު އޭރު އިދިކޮޅުގައި އޮތް ކޯލިޝަނުން ކާމިޔާބުކުރުމަށް ފަހު، މިދިޔަ އެޕްރީލް ހަވަނަ ދުވަހު ބޭއްވި މަޖިލިސް އިންތިޚާބުވެސް ސަރުކާރު ހިންގާ މައި ޕާޓީ، އެމްޑީޕީން ބޮޑު އަޣުލަބިއްޔަތަކުން ކާމިޔާބުކުރުމާއެކު އިދިކޮޅުގައި އޮތް ޕީޕީއެމާއި ޕީއެންސީގެ އަޑު ވަނީ ކެނޑިގެން ގޮސްފައެވެ.
ދަރަނިތައް ބޮލުގައި އެޅިފައި އޮތް ޕީޕީއެމް ދޫކޮށް، ޕާޓީގެ އިސް ސަފުގައި ތިއްބެވި ބޭފުޅުން ވަނީ އިންތިޚާބުގެ ކުރިން އުފެދުނު ޕީއެންސީއަށް ބަދަލުވެފައެވެ. ޕީޕީއެމާއި ޕީއެންސީ އެކުވެގެން ވެސް މަޖިލިސް އިންތިޚާބުގައި ކާމިޔާބު ކުރެވުނީ އެންމެ ފަސް ގޮނޑިއެވެ.