މިރޭ ހިތަދޫ އީސީސީ އާއި ދިމާލުން ބޮޑުމަގަށް ދާން އޮންނަ މަގުގައި ނުރައްކާތެރި އެކްސިޑެންޓެއް ހިނގައިފިއެވެ.
އެކްސިޑެންޓް ހިނގާފައިވަނީ އީސީސީ އާއި ދިމާލުން ބޮޑުމަގަށް ދިޔަ ސައިކަލް ކޮންޓްރޯލް ނުވެ މަގުގެ އަރިމަތީގައި ބަހައްޓާފައި ހުރި ސިމެންތި މާވަށި ގަނޑެއްގައި ޖެހިއެވެ.
ހާދިސާ ހިނގި ތަނަށް "އައްޑޫލައިވް"ގެ ނޫސްވެރިން ދިޔަ އިރު އެތަނުގައި ފުލުހުން ހަރަކާތްތެރިވަމުން ދިޔައެވެ. ފުލުހުން ބުނީ އާއްމު ފަރާތަކުން އެކްސިޑެންޓެއް ހިނގައިގެން އުޅޭ ކަމުގެ މައުލޫމާތު ލިބިގެން އައި އިރު އެކްސިޑެންޓްވި ސައިކަލް އެތަނަށް ވެއްޓިފައި އޮތް އިރު ސައިކަލް ދުއްވި މީހާ އެތަނުން ގޮސްފައިވާ ކަމަށެވެ.
އެހެން ކަމުން ސައިކަލް އައީ ކާކު ކަމެއް އަދި ނޭގޭ ކަމަށެވެ. ސައިކަލް ކޮންޓްރޯލް ނުވެ މާވަށިގަނޑުގައި ޖެހި ސައިކަލަށް ވަނީ ވަރަށް ބޮޑަށް ގެއްލުންވެފައެވެ. އަދި އެތަނުގައި ކޮންމެ ވެސް ވަރަކަށް ލޭގެ އަސަރު ފެންނާން ހުއްޓެވެ.
ފުލުހުން ބުނީ މީހަކު އެކްސިޑެންޓްވެގެން ހޮސްޕިޓަލަށް ދިޔަ ކަން އެނގިފައި ނުވާ ކަމަށެވެ. އަދި ހޮސްޕިޓަލަށް ގުޅައި މައުލުމާތު ސާފު ކުރަމުން އަންނަ ކަމަށެވެ.