ގިނަ ދުވަސްތަކެއް ވަންދެން ހިތަދޫ ރީޖަނަލް ހޮސްޕިޓަލުގައި ކަށީގެ ޑޮކްޓަރެއް ނެތި ގޮސްފައިވާއިރު އިއްޔެ ކަށީގެ ޑޮކްޓަރެއް އައްޑުއަށް އައުމަށް ހަމަޖެހިފައިވި ނަމަވެސް އޭނާ އައުން އަނެއްކާވެސް ފަސް ވެފައިވާ ކަމަށް ރީޖަނަލް ހޮސްޕިޓަލް ހިންގެވުމާއި ހަވާލުވެގެން ހުންނެވި ޝާހު ސައީދު ވިދާޅުވެއްޖެއެވެ.
ޝާހު ވިދާޅުވީ، ކަށީގެ ޑޮކްޓަރު ރާއްޖެ ނާދެވިގެން އުޅެނީ އޭނާގެ ޓިކެޓު ކުއްލި ގޮތަކަަށް ކެންސަލްވުމާ ގުޅިގެން ކަމަށެވެ. ނަމަވެސް އަދިވެސް ޑޮކްޓަރު ރާއްޖެ ގެނައުމުގެ މަސައްކަތް ކުރަމުން އަންނަ ކަމަށް ޝާހާ ހަވާލާދީ "ރާއްޖެ އެމްވީ" އިން ރިޕޯޓުކޮށްފައިވެއެވެ.
ނަމަވެސް ޑޮކްޓަރު އަންނާނެ ކަމަށް ލަފާ ކުރެވޭ ދުވަހެއް ހާމަކޮށްފައެއް ނުވެއެވެ. ބޮޑު އާބާދީއެއް ބޭސްފަރުވާގެ ކަންކަމަށް ބަރޯސާަވެފައި އޮތް ހިތަދޫ ރީޖަނަލް ހޮސްޕިޓަލުގައި ފެންވަރު ރަނގަޅު ސިއްހީ ހިދުމަތެއް ނުދެވޭތާ އެތައް އަހަރު ދުވަހެއް ފާއިތުވެ ގޮސްފިއެވެ.
ހޮސްޕިޓަލުގެ ހާލަތު ރަނގަޅު ކުރުމަށް ދާދި ފަހުން އައްޑޫ ރައްޔިތުން ވަނީ ހޮސްޕިޓަލް ކުރިމަތީ މުޒާހަރާ ވެސް ކޮށްފައެވެ.