މިސަރުކާރުން ރޯދަ މަހު ކުރަމުންދާ ކަމަކީ އުސޫލެއް ނެތި މީހުން ވަޒީފާއިން ވަކިކުރުން ކަމަށާއި އެކަން ކުށްވެރިކުރާ ކަމަށް އިދިކޮޅު ޕީއެންސީން ބުނެފިއެވެ.
ހއ. ދިއްދޫ ފެނަކަ އޮފީހުގެ ހަ މުވައްޒަފުންވެސް މިއަދު ވަޒީފާއިން ވަކިކޮށްފައިވާއިރު އެކަމާ ގުޅިގެން ޕީއެންސީން ނެރުނު ނޫސް ބަޔާނެއްގައި ބުނެފައިވަނީ، ސަރުކާރު މުވައްޒަފުން ވަޒީފާއިން ވަކިކުރަމުން ދަނީ "އެއްވެސް ހަމައެއް އުސޫލެއް ނެތި" ކަމަށެވެ.
އަދި ވަކި ފިކުރަކަށް ތާއީދު ކުރާ މުވައްޒަފުންނަށް ބިރު ދައްކަމުންދާ ކަމަށްވެސް ޕީއެންސީން ބުނެފައިވެއެވެ. ރޯދަމަހު އާއިލާތައް ބިކަކުރުމަށް ސަރުކާރުން ކުރާ މަސައްކަތް ކުށްވެރި ކުރާ ކަމަށް ވެސް މި ބަޔާނުގައި ބުނެފައިވެއެވެ.
ޕީއެންސީން ބުނެފައިވަނީ މިސަރުކާރަކީ މީހުން ވަޒީފާއިން ވަކިކުރާ ސަރުކާރު ކަމަށެވެ. އަދި ނިމިގެން ދިޔަ ރައީސް އަބްދުﷲ ޔާމީންގެ ވެރިކަމުގައި އެތައް ބަޔަކަށް ވަޒީފާ ދީފައިވާ ކަމަށް އެޕާޓީން ދައުވާ ކުރެއެވެ.