ހިތަދޫން ވިލާ ކޮލެޖަށް 45،000 އަކަ ފޫޓުގެ ބިމެއް ދިނުމަށް ކައުންސިލުން މަޝްވަރާ ފަށައިފިއެވެ.
"އައްޑޫލައިވް"އަށް އެނގިފައިވާ ގޮތުގައި ވިލާ ކޮލެޖަށް ދިނުމަށް މަޝްވަރާ ކުރެވެމުންދާ ބިމަކީ ހިތަދޫ ކްރެސްގާޑަން ރެސްޓޯރެންޓާއި ލިންކު ރޯޑާއި ދެމެދުން 45،000 އަކަފޫޓުގެ ބިމެކެވެ.
ވިލާ ކޮލެޖަށް ބޮޑު ބިމެއް އިއްލާން ކުރުމެއްނެތި ދިނުމަށް ކައުންސިލަށް ހުށަހެޅީ އައްޑޫގައި ވިލާ ކޮލެޖުގެ ކަންކަމާއި މީގެ ކުރިން އިސްކޮށް ހަރަކާތްތެރިވި އައްޑޫ ޑެޕިއުޓީ މޭޔަރ މުހައްމަދު ޔަސްރިފްއެވެ.
ޔަސްރިފު ހުށަހެޅި މައްސަލަ ބަލައި ގަނެ ކައުންސިލް ބައްދަލުވުމުގައި ވަނީ މަޝްވަރާކޮށްފައެވެ. އެގޮތުން ކައުންސިލް ބައްދަލުވުމުގައި ކުރި މަޝްވަރާގައި އިއްލާން ކުރުމެއްނެތި ބޮޑު ބިމެއް ވިލާ ކޮލެޖަށް ދިނުމާއި މެދު ބައެއް ކައުންސިލަރުން ވަނީ ދެކޮޅަށް ވާހަކަ ދައްކަވާފައެވެ.
އައްޑޫލައިވްއަށް އެނގިފައިވާ ގޮތުގައި ޑެޕިއުޓީ މޭޔަރ ޔަސްރިފް ވަނީ ކައުންސިލްގެ ބައެއް މެމްބަރުންނާއި އެކު މާލޭގައި މިދިޔަ އަހަރު ފަހުކޮޅު ވިލާ ކޮލެޖުގެ އިސްވެރިންނާއި އެކު ބައްދަލުވުމެއް ބާއްވާފައެވެ. މި ބައްދަލުވުން ބާއްވާފައިވަނީ ވިލާ ކޮލެޖުގެ މީޓިން ރޫމުގައެވެ.
ވިލާ ކޮލެޖުން ބޮޑު ބިމެއް ހޯދުމަށް ކައުންސިލަށް ހުށަހެޅުމާއި ގުޅިގެން، އެމައްސަލާގައި ބަހުސް ކުރުމަށްފަހު އިތުރަށް ދިރާސާ ކުރުމަށް އުމްރާނީ ތަރައްޤީ އާއި ބިމާއި ބެހޭ ކޮމެޓީއަށްވަނީ ފޮނުވާފައެވެ. އަދި އެކޮމިޓީގައި މައްސަލަ އޮތްވާ އަނެއްކާވެސް ވިލާ ކޮލެޖު ބިމުގެ މައްސަލަ މަރަދޫ ކައުންސިލަރު ފައިސަލް ވަނީ ކައުންސިލް ބައްދަލުވުމަށް ހުށަހަޅާފައެވެ.
އައްޑޫ ސިޓީ ކައުންސިލުން 29 އެޕްރީލް ވަނަ ދުވަހު އާއްމުކޮށްފައިވާ ކައުންސިލްގެ ނިންމުމުގައި ބުނެފައިވަނީ "އައްޑޫގެ ޑިވެލޮޕްމަންޓް ޕްލޭނުގައިވާ ތަޢުލީމީ ސިޔާސަތު ޙާޞިލްކުރުމަށްޓަކައި، ކައުންސިލަރ، ފައިޞަލް އިބްރާހިމް ހުށަހަޅުއްވާފައިވާ ގޮތުގެމަތީން ހިތަދޫ ކްރެސްގަރޑަންގެ އިރުން އޮތް ބިމުން 45000 (ސާޅީސް ފަސްހާސް) އަކަފުޓޫގެ ބިން ބީލަމަށް ހުޅުވާލުމަށް، ޤަވާއިދާއި އެއްގޮތްވާ ގޮތުގެމަތީން އިޢްލާންކުރުމަށް ފެންނަކަމަށް" ހުށަހެޅުނު އިޞްލާޙަށް ތާއީދު ލިބިފައިވުމުން، ރިޔާސަތުން ވޯޓަށް އެއްސެވެމުން މިއަދުގެ ޖަލްސާގައި ބައިވެރިވެ ވަޑައިގަތް މެމްބަރުންގެ އިއްތިފާޤުން މިހުށަހެޅުން ފާސްވިކަމަށެވެ.
މައްސަލަ ހުށަހެޅުއްވީ ޑެޕިއުޓީ މޭޔަރ މުހައްމަދު ޔަސްރިފްއެވެ. ތާއިދު ކުރެއްވީ މަރަދޫ ކައުންސިލަރު ފައިސަލްއެވެ. މި ނިންމުން ނިންމަން 5 މެމްބަރުން ވޯޓު ދެއްވިއިރު ތާއިދު ނުކުރައްވަނީ އެންމެ ކައުންސިލަރެކެވެ. އެއީ ހުޅުދޫ ދާއިރާގެ ކައުންސިލަރު އިބްރާހިމް ޝުކުރީއެވެ. މޭޔަރ އަބްދުﷲ ސޯދިގު ބައްދަލުވުމުގެ ރިޔާސަތު ބަލަހައްޓަވާތީ ވޯޓުގައި ބައިވެރިވެވަޑައިގެންފައި ނުވެއެވެ.
މިމައްސަލަ ދެވަނަ ފަހަރަށް ކައުންސިލް ބައްދަލުވުމަށް ގެނެސް ބިން އިއްލާން ކުރުމެއްނެތި ދޫކުރެވޭތޯ ގާނޫނީ ލަފާއަށްވެސް ވަނީ އަހާފައެވެ. ކައުންސިލުން އިއްލާން ކުރާ ގޮތަށް ފާސްކުރީ އިއްލާން ކުރުމެއްނެތި ބޮޑު ބިމެއް ދޫނުކުރެވޭނެކަމަށް ގާނޫނީ ލަފާ ދިނުމާއި ގުޅިގެންނެވެ
ވިލާ ކޮލެޖުގެ މިހާރުގެ ކްލާސް ތައް ހިތަދޫގައި ހިންގަނީ ސައީދިއްޔާ ސްކޫލް ހިންގުމަށް ސަރުކާރުން ދިން ބިމުގައި ހަދާފައިވާ އިމާރާތުގައެވެ. ކުރީ ސަރުކާރުން ޕްރީ ސްކޫލްތައް ސަރުކާރުން ހިންގަން ނިންމުމާއި ގުޅިގެން ސައީދިއްޔާ ސްކޫލް ހިންގުންވަނީ ހުއްޓިފައެވެ.