އައްޑޫ ސިޓީ ސްކްއާ ތަރައްޤީ ކުރުމަށް އެތަނުގައި ހުރި ރުއްގަސް ނެގުމާއި ގުޅިގެން ސިޓީ ކައުންސިލަށް އަމާޒުވެފައިވާ ފާޑުކިއުންތަކަށް ކައުންސިލުން ޖަވާބުދީފިއެވެ.
ކައުންސިލް ފޭސްބުކް ޕޭޖުގައި ސިޓީ ސްކުއާ ތަރައްޤީ ކުރާ ޕްލޭންގެ ފޮޓޯ އާއި އެކު ބުނެފައިވަނީ އެތަނުގައި ހުރި ރުއް ގަސް ނަގާފައިވަނީ އީޕީއޭގެ ހުއްދަ އާއި އެކު ކަމަށާއި، ސިޓީ ސްކުއާ ނިމޭއިރު އެތަނުގައި ހިޔާދޭ ގަސް އިންދައި ލޭންޑުސްކޭޕިން ހެދޭނެކަމަށެވެ.
"މިމަސައްކަތުގެ ތެރެއިން އީޕީއޭގެ ހުއްދައާއި އެކު މިހާރު ހުރި ބައެއް ގަސްތައް ނެގުމަށްފަހު ސިޓީ ސްކުއާ ފަރުމާ ކުރެވިފައިވާ ގޮތަށް، އާއްމުންނާއި ކުޑަކުދިން އެއްވެ އުޅޭ ސަރަހައްދަކާއި ގުޅޭ ހިޔާދޭ ގަސްތައް އިންދި، ލޭންޑްސްކޭޕިން މަސައްކަތް ކުރެވޭނެ" ކައުންސިލްގެ އެފްބީގައި ލިޔެފައިވެއެވެ.
ސިޓީ ސްކުއާ ތަރައްޤީ ކުރުމަށް އެތަނުގައި ހުރި ބޮޑެތި ރައް ގަސްތައް ނަގާތީ އެތައް ބަޔަކު ދަނީ ކައުންސިލަށް ފާޑު ކިޔަމުންނެވެ. އެގޮތުން ފާޑުކީ ފަރާތްތަކުން ބުނެފައިވަނީ ރުއް ގަސް ނުނަގައިވެސް އެތަން ތަރައްޤީ ކުރެވޭނެކަމަށެވެ. އަދި އަނެއް ބަޔަކު ބުނެފައިވަނީ އެތަނުން ނެގި ރައްތައް އެހެން ތަނެއްގައި އިންދަން ފެނޭކަމަށެވެ.
ސިޓީ ސްކްއާ ތަރައްޤީ ކުރުމަށް ސަރުކާރުން 3.2 މިލިއަން ރުފިޔާ ވަނީ އައްޑޫ ސިޓީ ކައުންސިލާއި ހަވާލުކޮށްފައެވެ. ސިޓީ ސްކުއާ ތަރައްޤީ ކުރުމަކީ ރައީސް ސޯލިހުގެ ވެރިކަމުގެ ފުރަތަމަ 100 ދުވަހުގެ ތެރޭގައި ނިންމަން ހިމަނާފައިވާ ކަމެކެވެ.