މިސަރުކާރުގައި ވެސް ރައީސުލް ޖުމުހޫރިއްޔާ އައްޔަން ކުރައްވާ ދައުލަތުގެ ވުޒާރާއެއްގެ ނުވަތަ އެހެންވެސް ސިޔާސީ މަގާމަކުން ނުފެންނާނެ ކަމަށާއި ނަމަވެސް، އިލެކްޝަންސް ކޮމިޝަންގެ ރައީސްގެ މަގާމު އަދާ ކުރުމަށް ފަހު، ސަރުކާރު ހިއްސާވާ ކުންފުންޏަކުން ފެނިގެން ހިނގައިދާނެ ކަމަށް އީސީ ރައީސް އަހުމަދު ޝަރީފް ވިދާޅުވެއްޖެއެވެ.
ޝަރީފް "ޕީއެސްއެމް" ނިއުސްއަށް ދެއްވި އިންޓައިވިއުއެއްގައި އަންނަ އަހަރުގެ ލޯކަލް ކައުންސިލް އިންތިޚާބު ނިމުމުން އިލެކްޝަންސް ކޮމިޝަންގެ ރައީސްގެ މަގާމުން އިސްތިއުފާ ދެއްވާނެ ކަން ވަނީ ހާމަކުރައްވާފައެވެ. ސަބަބަކަށް ދެންނެވީ ސިޔާސީ ހަރަކާތްތަކުގައި އުޅެން ބޭނުންވާތީ ކަމަށެވެ.
އިލެކްޝަންސް ކޮމިޝަންގައި ތިއްބަވާ ބޭފުޅުންނަށް ސިޔާސީ ޕާޓީތަކުގެ ހަރަކާތްތަކުގައި ބައިވެރިނުވެވޭ އިރު ޝަރީފް ވިދާޅުވީ ސިޔާސީ މަސައްކަތް ކުރަން އަދިވެސް ޝައުގުވެރިކަން ހުންނަ ކަމަށެވެ.
ރިޔާސީ އިންތިޚާބުގައި ކުރީގެ ރައީސް ޔާމީން ބަލިވުމުން އެމަނިކުފާނާއި އެމަނިކުފާނުގެ ސަޕޯޓަރުން ވަނީ އިލެކްޝަންސް ކޮމިޝަނުން ވޯޓު އޮޅުވާލާފައިވާ ކަމުގެ ތުހުމަތުކޮށް ސުޕްރީމް ކޯޓަށް އިންތިޚާބު ބާތިލުކުރަން ވެސް ހުށައަޅާފައެވެ.
ނަމަވެސް ސުޕްރީމް ކޯޓުން މައްސަލަ ބަލައި، އިންތިޚާބު ބާތިލުކުރަން ޖެހޭ ސަބަބެއް ނެތް ކަމަށް ވަނީ ކަނޑައަޅާފައެވެ.