އައްޑޫ ސިޓީ ކައުންސިލަށް އައްޑޫގެ ތަރައްޤީއަށް ހާސިލު ކުރަން ޖެހޭ ގިނަ ލަނޑުދަނޑިތައް ހާސިލު ނުކުރެވޭ ވާހަކަ އަކީ ވަރަށް ގިނަ މީހުން ދައްކާ ވާހަކައެކެވެ.
ގިނަ ބަޔަކަ ސިފަ ކުރާގޮތުގައި ކައުންސިލް އަކީ ނާޤާބިލު "ނުކުޅެދޭ" ކައުންސިލް އެކެވެ. ތެދެކެވެ. ލާމަރުކަޒީ އުސޫލޫން އިދާރީ ރަށްތަށް ހިންގުމުގެ ޤާނޫނުގެ ދަށުން ކައުންސިލްތަށް އިންތިހާބު ކުރެވުނު ފަހުން، އައްޑޫސިޓީއަކަށް، މާބޮޑު އެދެވޭ ތަރައްޤީ އެއް އައިސްފައި ނުވެއެވެ.
މިކަން މިހެން ވާން ޖެހުމުގެ ވަރަށް ގިނަ ސަބަބުތަކެއް އެބަވެއެވެ. އެގޮތުން ބަލާއިރު، ލާމަރުކަޒީ އުސޫލުން، ރަށްތަށް ހިންގުމުގެ "ކޮންސެޕްޓް" އަކީ ދިވެހިރާއްޖެއަށް މުޅީންވެސް އާއެއްޗެކެވެ.
އައްޑޫސިޓީގެ ކައުންސިަލަރ އަކު ވިދާޅުވި ގޮތުގައި ހުރިހާ ކައުންސިލަރުން ވެސް ފުރަތަމަ 6 މަސް ދުވަހު ތިއްބެވީ "ވާނުވާ" ގައެވެ. ކައުންސިލް ހިންގަން ޖެހޭ ގޮތުގެ "ނޯ ހައު" އެނގިވަޑައިގަތީ 6 މަސް ، 7 މަސް ވަރު ފަހުންކަމަށެވެ. އެއްގޮތުން ބަލާއިރު އެއީ މުޅިއަކުން ދޮގު ވާހަކަ އެއްވެސް ނޫނެވެ.
ދެން ކައުންސިލްއަށް ދިމާވި އެންމެ ބޮޑު ގޮންޖެހުމަކީ އެމްޑީޕީގެ ސަރުކާރެވެ. ކައުންސިލް އަކީ 100 އިންސައްތަ އެމްޑީޕީ ކައުންސިލް އެއްކަމުން، ސަރުކާރުން ރައްޔިތުންގެ ވިންދާ ދެކޮޅަށް ކުރާ ގިނަ ކަންކަމުގައި ވެސް ކައުންސިލް އޮތީ "ހަނު" އެވެ. ކައުންސިލް އިން ނިންމަން ޖެހޭ ގިނަ ކަން ކަން ސީދާ މައި ސަރުކާރުން އެދުވަސްވަރު ނިންމާފައި އެބަހުއްޓެވެ. އަދި ހުޅުމީދު މަގުތަކުގައި ގާ އެޅުންފަދަ ޕްރޮޖެކްޓުތަށް ފެށިގެން އައިރު ކައުންސިލްއަކަށް ނުވެެސް އެނގެއެވެ. ގޮތަކަށް ބުނަނީނަމަ އެދުވަސްވަރު ކައުންސިލް އޮތީ މައި ސަރުކާރުގެ މުށުތެރޭގައެވެ.
ދުނިޔޭގެ ކުރިއަރާފައިވާ ޤައުމުތަކުގައި، ލޯކަލް ކައުންސިލްތަށް ހިންގަނީ ވަރަށް ބޮޑަށް ޕާރޓީ ފިކުރުން އެއްކިބާ ވެގެންނެވެ. ލޯކަލް ކައުންސިލް ތަކަކީ ވަރަށް ބޮޑަށް ރައްޔިތުންނާއި ގުޅިގެން ގޮތް ނިންމަންޖެހޭ ބަޔެކެވެ.
އެހެނަސް، ދިވެހިރާއްޖޭގައި، މި ނިޒާމް އުފެދިގެން އައިސްފައި މިއޮތީ ސިޔާސީ ޕަރޓީތަކަށް މާ ބޮޑަށްވެސް ކައުންސިލްތަކަށް ނުފޫޒު ފޯރުވޭގޮތަށެވެ.
އެހެންކަމުން، ކައުންސިލް އިން ބޭނުންވާ ގޮތަށް ގިނަފަހަރު ތަރައްޤީގެ ޕްލޭންތަށް ކުރިޔަކަށް ނުގެންދެވެއެވެ. އަދި ގިނަ ޕާރޓީތަކުން ދެކޭގޮތުގައި، ޕާރޓީގެ ރަށު އޮފީސްތައް އަދި ހަރުގެތައް ހިންގަންޖެހޭނީ އެ ދާއިރާގެ ކައުންސިލަރުންނެވެ.
އައްޑޫސިޓީ ގައިވެސް ޕާރޓީގެ އެއްވުންތަކުން މަދުން ފެންނަ ކައުންސިލަރުން ލޭބަލް ވެފައި އޮންނަނީ "ކަޑަ" ބަޔެެއްގެ ގޮތުގައެވެ.
އެހެންކަމުން، ތަރައްޤީއަށް މަސައްކަތް ނުކުރެވި އޮތް އެއް ސަބަބކީ ޕާރޓީ ފިކުރޭ ވެސް ބުނެވިދާނެއެވެ.
ޒަމާނުއްސުރެ، ދިވެހިންނަށް ހޭނިފަ އޮތްގޮތަކީ، ވެރިން ބުނާގޮތަށް ކަންތައްކޮށްގެން ތިބުމެވެ. "ވެރިޔާ" ބުނެފިއްޔާ ކޮންމެކަމެއްވިޔަސް ވަރިހަމައެވެ. އަދި ވެރިއަކަށް ހުންނަ ބޭފުޅަކު ކަންތައް ކުރާނީ އަބަދުވެސް ރަނގަޅަށެވެ. ގިނަ ބަޔެއްގެ ސިކުނޑީގައި އަދިވެސް ވިސްނުން ހަރުލާފައި ހުރީ މިގޮތަށެވެ. އެހެންކަމުން، ކައުންސިލް އިންތިހާބުވެ މަޤާމްގެ ހުވައި ކުރުމުން ހުރިހާ ރައްޔިތުންވެސް ހަމަޖެހިލިއެވެ. އަދި ގިނަ ފަހަރު ކައުންސިލުން ކުރަނީ ކޮންކަމެއްތޯ ބަލާވެސް ނުލައެވެ. މިހެން ހެދުމުގެ ސަބަބުން، ޖުމްލަގޮތެއްގައި ކައުންސިލް ގެ ޒިންމާދާރުކަން ވަނީ ވަރަށް ބޮޑުތަންވެސް ދަށްވެފައެވެ. ޑިމްކޮރަސީއެއްގެ އެންމެ މުހިންމު ބަޔަކީ ރައްޔިތުންނެވެ. އެހެންކަމުން ކައުންސިލް ޒިންމާދާރުކޮށް ތަރައްޤީއަށްޓަކައި މަސައްކަތް ކުރުވުމަށް ހުރިހާ ރައްޔިތުންވެސް މަސައްކަތް ކުރަންޖެހެވެ.
ކައުންސިލް އިންތިޙާބް ވިތާ 2 އަހަރު ވާއިރު، ގިނަ ކަންތައްތަށް ނުވެ އޮތީ ވަރަށް ގިނަ ބަޔެއްގެ އިހުމާލުންނެވެ. ކައުންސިލް އަދި އައްޑޫސިޓީގެ ރައްޔިތުންގެ އިހުމާލު މިކަމުގައި ބޮޑެވެ.
އެހެން ނަމަވެސް އާ އަހަރަކާއެކު އާ އަޒުމްތަކާއިގެން ހިތްވަރާއެކު ކައުންސިލާއި ރައްޔިތުން ގުޅިގެން ހީވާގި ކަމާއިއެކު މަސައްކަތް ކޮށްފިނަމަ އަޅުގަނޑުމެން މި އެދޭ ތަރައްޤީގެ ކުލަވަރުތަށް ފެންނަން ފާށާނެކަން ޔަޤީނެވެ.