ސ. ގަން އެއާޕޯޓްގެ ރަންވޭ ދިގު ކުރުމަށް ބޭނުންވާ ބިން ހިއްކުމުގެ މަސައްްކަތް ކުރާ ދުބާއީގެ ގަލްފް ކޮބްލާ ކުންފުނިން އައްޑޫގައި އިތުރު 70 ހެކްޓަރުގެ ބިން ހިއްކައި ދޭން އެއްބަސްވެފައިވާ ކަމަށް ރައީސް ޑރ. މުހައްމަދު ވަހީދު ހަސަން މަނަކު ވިދާޅުވެއްޖެ އެވެ.
ބުރާސްފަތި ދުވަހުގެ ރޭ "ގައުމާއިގެން ކުރިއަށް" ކޯލިޝަނުން ހިތަދޫ ޝަރަފުއްދީން ސްކޫލްގައި ބޭއްވި ޖަލްސާގައި ރައީސް ވިދާޅުވީ އެއާޕޯޓަށް ބޭނުންވާ ބިން ހިއްކައި ނިމުމުން ގަލްފް ކޮބްލާއިން އެ މަަސައްކަތް ފަށާނެ ކަމަށެވެ. އެގޮތުން އައްޑޫގެ އެކިއެކި ދިމާލުން 70 ހެކްޓަރުގެ ބިން ހިއްކާނެ ރައީސް ވިދާޅުވި އެވެ.
ގަލްފް ކޮބްލާ އާ ހަވާލުކޮށްގެން 7 ހެކްޓަރުގެ ބިން ހިއްކަން ނިންމާފައިވާ އިރު ކޮންޓްރެކްޓަ ފައިނޭންސްގެ ދަށުން އައްޑޫގެ ހަތަރު ރަށެެއްގެ ބިން ހިއްކަން ވެސް ދާދި ފަހުން ވަނީ ބީލަމަށް ލާފަ އެވެ.
އެގޮތުން ހިތަދޫން 41 ހެކްޓަރު، ފޭދޫން 75، ހެކްޓަރު އަދި މަރަދު އާއި މަރދޫފޭދޫން 75 ހެކްޓަރުގެ ބިން ހިއްކަން ހައުސިން މިނިސްޓްރީން ވަނީ ނިންމާފަ އެވެ.
އެހެން ނަމަވެސް މިކަމާ ގުޅިގެން މަޖިލީހުގެ މާލީއްޔަތު ކޮމިޓީން ވަނީ އެއީ މި އަހަރުގެ ބަޖެޓްގައި ހިމަނާފައި ނެތް މަޝްރޫއެއް ކަމަށް ބުނެ އެކަން ނުކުރެވޭނެ ކަމަށް އަންގާފަ އެވެ. އަދި ފިނޭންސް މިނިސްޓްރީން ވެސް ބުނެފައި ވަނީ އެ މަޝްރޫއު އިއުލާން ކުރީ އެ މިނިސްޓްރީގެ ހުއްދަ ނެތި ކަމަށެވެ.
އެހެން ނަމަވެސް ހައުސިން މިނިސްޓަރު. ޑރ. މުހައްމަދު މުއިއްޒު ވިދާޅުވެފައި ވަނީ އެ މަޝްރޫއުކީ ގާނޫނާ އެއްގޮތަށް ކުރިއަށް ގެންދާ މަޝްރޫއެއް ކަމަށެވެ. އެހެންވެ އެކަން ޕްލޭންކޮށްފައިވާ ގޮތަށް ކުރިއަށް ގެންދަވާނެ ކަމަަށެވެ.
މިނިސްޓަރު އަދި ވިދާޅުވެފައި ވަނި ހިތަދޫން ހިއްކަން ނިންމި 41 ހެކްޓަރު ހިއްކައި ނިމުމުން އިތުރު ފިޔަަވައްސެއްގެ ދަށުން ހިތަދޫން ބިން ހިއްކާނެ ކަމަށެވެ.