ރައީސް އިބްރާހިމް މުހައްމަދު ސޯލިހް ވެރިކަމަށް ވަޑައިގަތުމުގެ ކުރިންނާއި، ފަހުންވެސް ކޮރަޕްޝަނަށް ދެއްވާނީ "ޒީރޯ ޓޮލެރެންސް" ކަމަށް ވިދާޅުވި ނަމަވެސް އެމަނިކުފާނުގެ ވެރިކަމުގައި ފާއިތުވެދިޔަ ކުރު މުއްދަތުގެ ތެރޭގައި ހިނގާފައިވާ ކަންތައްތަކުގެ ސަބަބުން ގޭގައި ތިބުމަށް ދަތިވެފައިވާ ކަމަށް ޕީއެންސީގެ ނައިބު ލީޑަރ އަހުމަދު ނިހާން ހުސެއިންމަނިކު ވިދާޅުވެއްޖެއެވެ.
އިދިކޮޅު ފަރާތްތަކުގެ އަޑު ފަނޑުވެފައިވާ މިދަނޑިވަޅުގައި ރޭ ޕީއެންސީން ބޭއްވި ނޫސްވެރިންގެ ބައްދަލުވުމެއްގައި ނިހާން ވަނީ ބަންޑާރަ ނައިބު އިބްރާހިމް ރިފްއަތަށް ވަރަށް ބޮޑަށް ފާޑުވިދާޅުވެ އެމަނިކުފާނުގެ ވާހަކަ ތަކުރާރުކޮށްފައެވެ.
ނިހާން ވިދާޅުވީ، ފާއިތުވެދިޔަ ހަތަރު ވަރަކަށް މަސް ދުވަހު އެންމެ ގިނައިން އިވޭ ނަންފުޅަކީ ބަންޑާރަ ނައިބު ރިފްއަތުގެ ނަންފުޅު ކަމަށެވެ. ދީބާޖާގެ މައްސަލައާއި އެހެނިހެން މައްސަލަތަކުގައި ވެސް އެމަނިކުފާނުގެ ސިއްރު އަތެއް ވާކަމަށް އަޑުފެތުރިފައިވާ ކަމަށް ނިހާން ވިދާޅުވިއެވެ.
އެގޮތުން އަލްހާން ފަހުމީ ވަނީ ރިފްއަތުގެ ފަރާތުން ބޭފުޅަކު ވަޑައިގެން މިވެނި ވަރަކަށް ފައިސާ ދިނުމުން މައްސަލަ ސެޓުލް ކޮށްދޭނެ ކަމަށް އަލްހާންގެ އަމިއްލަ ޓުވިޓާ އެކައުންޓުގައި ހާމަކޮށްފައިވާ ކަން ނިހާން ފާހަގަކުރެއްވިއެވެ.
ނިހާން ވަނީ ބަންޑާރަ ނައިބަކީ ވަޒީރުންގެ މަޖިލީހުގައި ހުންނަވާ ވަރަށް ޚާއްސަ މަސްއޫލިއްޔަތެއް އަދާކުރައްވާ ބޭފުޅެއް ކަމަށާއި ރިފްއަތަށް މަގާމުގެ މަސްއޫލިއްޔަތު އަދާ ނުކުރެވޭ ކަމަށް ދޭހަވާ މޭރުމުން ވާހަކަ ދައްކަވާފައެވެ.
ކޮރަޕްޝަނުގެ ތުހުމަތުތައް އެކި ފަހަރު މަތިން އޭޖީ ރިފްއަތަަށް ކުރެވުނު ނަމަވެސް އެމަނިކުފާނު ވަނީ ހުރިހާ ތުހުމަތެއް ދޮގު ކުރައްވާފައެވެ.