މިމަހުގެ 28 ވަނަ ދުވަހު ހުވާކުރާ އާ މަޖިލީހުގެ ރައީސްގެ މަގާމަށް އެމްޑީޕީން ގެންނާނެ ބޭފުޅަކު ކަނޑައަޅަން ހޯމަ ދުވަހު ޕީޖީ ގްރޫޕުގެ ބައްދަލުވުމެއް ބާއްވަން ނިންމައިފިއެވެ.
މިބައްދަލުވުމުގައި ގޮނޑި ކާމިޔާބުކުރި 65 މެމްބަރުންގެ މެދުގައި ވޯޓެއް ނަގައި ރައީސާއި ނައިބު ރައީސަށް ގެންނާނެ ބޭފުޅަކު ކަނޑައެޅުމަށް ހަމަޖެހިފައިވާ ކަމަށް އެމްޑީޕީން ވަނީ މެމްބަރުންނަށް އަންގާފައެވެ. ނަމަވެސް ބައްދަލުވުން ބާއްވާ ތަނަކާއި ވަގުތެއް ކަނޑައަޅާފައެއް ނުވެއެވެ.
މަޖިލިސް އިންތިޚާބުގައި ހިތަދޫ އުތުރު ދާއިރާގެ ގޮނޑި އަނެއްކާވެސް ކާމިޔާބުކުރެއްވި މުހައްމަދު އަސްލަމް، މަޖިލީހުގެ ރައިސަކަށް ގެނައުމަށް ޕާޓީގެ ރައީސް މުހައްމަދު ނަޝީދު ވަނީ ތާޢީދު ކުރައްވައި ޚިޔާލު ހުށައަޅާފައެވެ. ނަމަވެސް ރޭ، ރައީސް އިބްރާހިމް މުހައްމަދު ސޯލިހް ވަނީ އެމަނިކުފާނު ތާއީދު ކުރައްވާ ބޭފުޅަކީ ވިލުފުށި ދާއިރާއަށް އިންތިޚާބުވި ހަސަން އަފީފް ކަން ހާމަ ކުރައްވާފައެވެ.
ދެބޭފުޅުންގެ އިތުރުން މެދު ހެންވޭރު ދާއިރާގެ މެމްބަރު އަލީ އާޒިމާއި އައްޑޫ މީދޫ ދާއިރާގެ މެމްބަރު ރޮޒެއިނާ އާދަމް އަދި މަރަދޫ ދާއިރާގެ މެމްބަރު އިބްރާހިމް ޝަރީފް ވެސް ވަނީ މަޖިލީހުގެ ރައީސްގެ މަގާމަށް ޝައުގުވެރިކަން ފާޅުކޮށްފައެވެ.