ޤައުމުގެ މަސްލަހަތު ގުޅިފައިވަނީ ރައްޔިތުންގެ މަސްލަހަތާއި ކަމަށާއި އެހެން ކަމުން އެ ކަމަނާ ވޯޓު ދެއްވާނީ މުހައްމަދު އަސްލަމް އަދި އީވާ އަބްދުﷲއަށް ކަމަށް މަޝްހޫރު ޤާނޫނީ ވަކީލު އަދި ތުޅާދޫ ދާއިރާގެ އިންތިޚާބީ މެމްބަރު ހިސާން ހުސައިން ވިދާޅުވެއްޖެއެވެ.
ހިސާން މިހެން ވިދާޅުވެފައިވަނީ އާދީއްތަދުވަހުގެ ރޭ ކުރެއްވި ޓްވީޓެއްގައެވެ.
Gaumuge maslahathu gulhifaivanee rayyithunge maslahathaa. Rayyithunge maslahath himaayah kureveynee rayyithunge vindhaa ehgothah kan kurumun. Alhugaduge vote MP @aslamdp ashaai MP @evattey ah. pic.twitter.com/RImKu8C2eE
— Hisaan 🎈؟ (@hisaanhussain) May 26, 2019
"ޤައުމުގެ މަސްލަހަތު ގުޅިފައިވަނީ ރައްޔިތުންގެ މަސްލަހަތާއި. ރައްޔިތުންގެ މަސްލަހަތު ހިމާޔަތްކުރެވޭނީ ރައްޔިތުންގެ ވިންދާއި އެއްގޮތަށް ކަންކުރުމުން. އަޅުގަނޑުގެ ވޯޓު މެމްބަރު އަސްލަމް އަށާއި އީވާއަށް." ހިސާން ވިދާޅުވިއެވެ.
މަޖިލިސް ރައީސް އަދި ނައިބު ރައީސްއަށް އެންމެ އެކަށީގެންވަނީ ކޮން ބޭފުޅުންނެއްތޯ މިއީ މިހާރު މެމްބަރުންގެ މެދުގައި އެންމެ ބޮޑަށް ބަހުސްކުރެވޭ އެއް މަޢުޟޫޢުއެވެ. އެގޮތުން ރައީސް މުހައްމަދު ނަޝީދު ވަނީ ހިތަދޫ އުތުރު ދާއިރާގެ މެންބަރު މުޙައްމަދު އަސްލަމްގެ ނަން މަޖިލީހުގެ ރައީސްކަމަށް އެންޑޯޒް ކުރައްވާފައެވެ.
ނަމަވެސް ދާދިފަހުން މަޖިލީހުގެ ރައީސް ދެއްވި ތަރާވީހެއްގައި ބައިވެރިވެވަޑައިގަތުމަށްފަހު ނޫސްވެރިންނާ ބައްދަލުކުރައްވާ ވާހަކަފުޅުދައްކަވަމުން ރައީސް އިބްރާހީމް މުހައްމަދު ޞާލިހްވަނީ މަޖިލީހުގެ ރައީސަކަށް އެންމެ އެކަށީގެންވާ ބޭފުޅަކީ ވިލިފުށީ ދާއިރާގެ އިންތިޚާބީ މެންބަރު ޙަޞަން އަފީފުކަމަށް ވިދާޅުވެފައެވެ.