ރައީސް އިބްރާހިމް މުހައްމަދު ސޯލިހާއި ދެމެދު އޮތް އެކުވެރިކަމުގެ ގުޅުމަށް ކުޑަވެސް ހީނަރުކަމެއް ބުރުލެއް އަރާފައިނުވާ ކަމަށް 19 ވަނަ ރައްޔިތުންގެ މަޖިލީހުގެ ރައީސް ކަމަށް އެމްޑީޕީން ހޮވި މައްޗަނގޮޅި މެދު ދާއިރާގެ އިންތިޚާބީ މެމްބަރ އަދި ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.
ނަޝީދު މިހެން ވިދާޅުވީ މަޖިލިސް ރައީސްގެ މަގާމަށް އެމްޑީޕީން ގެންނާނެ މެމްބަރަކު ހޮވަން ބޭއްވި ޖަލްސާއަށް ފަހު މީޑިޔާއާ ވާހަކަ ދައްކަވަމުންނެވެ.
މަޖިލީސް ރައީސްގެ ކެމްޕޭނުގެ ތެރެއިން ރައީސް އިބްރާހިމް މުހައްމަދު ސޯލިހް ވަނީ، ވިލުފުށި ދާއިރާއަށް އިންތިޚާބުވި ހަސަން އަފީފަށް ތާއީދު ކުރައްވާފައެވެ. އޭގެ ކުރިން ނަޝީދު ވަނީ ހިތަދޫ އުތުރު ދާއިރާގެ މެމްބަރު އަސްލަމަށް ތާއީދު ކުރައްވައި ތާއީދު ހޯއްދަވަން މަސައްކަތް ކުރައްވާފައެވެ.
އޭގެ ސަބަބުން އެމްޑީޕީގެ އެތެރޭގައި ޚިޔާލު ތަފާތުވުންތައް އުފެދި ރައީސް ސޯލިހާއި ރައީސް ނަޝީދާ ދެމެދު މައްސަލަ ޖެހި އިތުބާރު ގެއްލިފައިވާ ކަމަށް ބުނެ އަޑުވަނީ ފެތުރިފައެވެ.
ނަމަވެސް މިރޭ ނަޝީދު ވަނީ އެމަނިކުފާނާއި ރައީސްއާ ދެމެދު ކުޑަވެސް މައްސަލައެއް ނެތް ކަމަށާއި އަދި ދެބޭފުޅުންގެ ގުޅުމަށް ހީނާރު ކަމެއް ނާންނާނެ ކަމަށް ވިދާޅުވެފައެވެ. އަދި ރައީސް ސޯލިހާއި އަބަދުވެސް، ކޮންމެ ކަމަކާ ގުޅިގެން ވެސް މަޝްވަރާ ކުރައްވާ ކަމަށާއި، ބަހުސް ކުރައްވާ ކަމަށް ވިދާޅުވެ ކުރިއަށް އޮތް ތަނުގައި ވެސް އެކަން އޮންނާނީ އެގޮތަށް ކަމަށް ނަޝީދު ވަނީ ވިދާޅުވެފައެވެ.