ކުށެއް ކުރެވެމުންދާ ކަން އެނގޭ ހާލަތުގައި ފުލުހުންނަށް އެ ކުށް ރިޕޯޓުކޮށް، ފުލުހުންގެ ވަޒީފާ އަދާކުރުމުގެ ފުރުސަތު ފުލުހުންނަށް ދިނުމަށާއި، ފުލުހުންގެ ވަޒީފާ އާންމުން އަދާ ނުކުރުމަށް ކޮމިޝަނަރ އޮފް ޕޮލިސް މުޙައްމަދު ހަމީދު ދިވެހި ރާއްޖޭގެ ހުރިހާ ރައްޔިތުންގެ ކިބައިން އެދިވަޑައިގެންފައެވެ.
ރާއްޖޭގެ ދެ ސަރަހައްދެއްގައި އާންމުން ވެގެން ކުށްކުރި ކަމަށް ބުނާ ބަޔަކު ހިފާ ހައްޔަރުކޮށްފައިވާ މިދަނޑިވަޅުގައި ސީޕީ ވަނީ އެންމެހާ ރައްޔިތުން ވެސް ގާނޫނަށް ބޯލަނބާ ގާނޫނުގެ ތެރެއިން ދިރިއުޅުން ބައްޓަން ކުރުމަށް ގޮވާލާފައެވެ.
ކ. ދިއްފުށީގައި މިދިޔަ ހަފްތާ ތެރޭގައި އާންމުން ވަނީ މި ރޯދަ މަހު ރަށުގައި ވައްކަން އިންތިހާއަށް އިތުރުވުމާ ގުޅިގެން ރަށުގެ ފުލުހުންނަށް ވައްކަން ނުހުއްޓުވޭ ކަމަށް ބުނެ ތުހުމަތު ކުރެވޭ "ވަގުން" ހިފާ ހައްޔަރުކޮށް ބޮޑެތި އަނިޔާތަކެއް ދީފައެވެ. ޖެހިޖެހިގެން ދެ ރޭ މަތިން ތުހުމަތު ކުރެވޭ ބަޔަކަށް އަނިޔާދީ ތަޅާ ޒަޚަމްކުރި ފަހުން ފުލުހުން ވަނީ ރަށުގައި ހަރަކާތްތެރިވާ މިންވަރު އިތުރުކޮށް ޕެޓްރޯލް ކުރުން އިތުރުކޮށްފައެވެ.
މީގެ އިތުރުން މިހަފްތާގައި ހުޅުމާލޭގައި 19 އަހަރުގެ ފިރިހެނަކު އުމުރުން 6، އަދި 8 އަހަރުގެ ކުޑަ ދެފިރިހެން ކުދިންނަށް ގަދަކަމުން ޖިންސީ ގޯނާ ކުރިކަމަށް ތުހުމަތު ކުރެވިގެން ބަޔަކު ވަނީ އޭނާ ހިފާ ހައްޔަރުކޮށް ކުށަށް އިއުތިރާފް ކުރުވައި ހުޅުމާލެ މަގުގައި ގަން ހިންގާ ފުލުހުންނާ ހަވާލުކޮށްފައެވެ. ފުލުހުން ވަނީ އެރޭ ދަންވަރު އޭނާ ކޯޓު އަމުރެއްގެ ދަށުން ހައްޔަރުކޮށްފައެވެ.
މިފަދަ ހާދިސާތަކާ ގުޅިގެން ސީޕީ ހަމީދު ކުރެއްވި ޓުވީޓެއްގައި އާންމު ރައްޔިތުން ގާނޫނު ތަންފީޒު ނުކުރެއްވުމަށް ގޮވާލެއްވުމަށް ފަހު، ފުލުހުންގެ ޚިދުމަތް އިތުރަށް ފުޅާ ކުރަން މަސައްކަތް ކުރައްވަމުން އަންނަ ކަމަށް ވިދާޅުވެފައިވެއެވެ.